Qyrǵyzstanda orta kásiporyndar azaıyp, jeke kásipkerler sany kóbeıdi
ASTANA. KAZINFORM — 2025 jylǵy 1 qańtarǵa qaraı eldegi jeke kásipkerler sany 488 myńnan asty, dep habarlaıdy Kabar.
Bul týraly Ulttyq statıstıka komıtetiniń qarjy jáne baǵa statıstıkasy basqarmasynyń basshysy Malıka Abdýkadırova Bishkekte ótken baspasóz konferentsııasynda málimdedi.
Onyń aıtýynsha, 2024 jyly respýblıka aýmaǵynda 24,6 myń shaǵyn kásiporyn jáne 905 orta kásiporyn jumys istegen. Sharýa (fermerlik) qojalyqtarynyń sany 475 myńdy qurady. 2023 jylmen salystyrǵanda, orta kásiporyndar men sharýa (fermerlik) qojalyqtar sanynyń azdap qysqarǵany baıqalady.
— Shaǵyn jáne orta kásiporyndardyń eń kóbi Bishkek qalasynda tirkelgen — 18,6 myń kásiporyn nemese olardyń jalpy sanynyń shamamen 73 paıyzy. Naryn oblysynda olardyń sany — 337, bul respýblıkadaǵy shaǵyn jáne orta kásiporyndardyń 1,3 paıyzyna teń. Osh oblysynda 89 myńǵa jýyq jeke kásipker tirkelgen — bul olardyń jalpy sanynyń 18 paıyzynan astamy. Al eń az kórsetkish Talas oblysynda — shamamen 16 myń. Bishkek qalasynda 71 myńnan astam jeke kásipker tirkelgen, — dedi ol.
Abdýkadırovanyń aıtýynsha, sharýa qojalyqtarynyń eń kóp bóligi Osh oblysynda shoǵyrlanǵan — 138 myńǵa jýyq. Bul kórsetkishke aýyl sharýashylyǵymen aınalysatyn jeke kásipkerler de kiredi. Shaǵyn jáne orta kásipkerlik sýbektileriniń jalpy sanynyń ishinde (sharýa qojalyqtaryn esepke almaǵanda) 39 paıyzy saýda salasynda, 25 paıyzy aýyl sharýashylyǵy men balyq sharýashylyǵynda, 10 paıyzy kólik salasynda, al 6 paıyzy ónerkásipte jumys isteıdi.
— Jalpy alǵanda, 2024 jyly shaǵyn jáne orta kásipkerlik sýbektileriniń qyzmeti oń dınamıkamen sıpattaldy. Jyl qorytyndysy boıynsha jalpy qosylǵan qun kólemi 664,6 mıllıard somdy qurap, JІÓ-niń 43,6 paıyzyna teń boldy. Eń úlken úles jeke kásipkerlerge tıesili — 282 mıllıard somnan astam nemese 18,5 paıyz, — dedi maman.
Budan buryn habarlanǵandaı, Qyrǵyzstanda biryńǵaı tólqujat engiziledi: endi kez kelgen qurylys nysanyn QR kod arqyly tekserýge bolady.