Qyrǵyzstanda oqýshylar men stýdentterdi teatr men mýzeıge barýǵa mindetteý usynyldy
ASTANA. KAZINFORM — Qyrǵyzstanda oqýshylar men stýdentterdiń teatr qoıylymdary men mádenı sharalarǵa mindetti túrde barýyn kózdeıtin abonement júıesin engizý usynyldy, dep habarlaıdy Qyrǵyzstandaǵy Kazinform agenttiginiń menshikti tilshisi.
Tıisti prezıdent jarlyǵynyń jobasy qoǵamdyq talqylaýǵa shyǵaryldy.
Jobaǵa sáıkes, ár oqýshy men stýdent bir jyl ishinde:
-
teatr jáne oıyn-saýyq mekemeleriniń is-sharalaryna (spektaklder, kontserttik baǵdarlamalar) eki ret;
-
mýzeılerge eki ret barýǵa tıis.
Osylaısha, bir adam jylyna jalpy sany tórt mádenı is-sharaǵa qatysady. 1 mln 821 myń 633 oqýshy men stýdentke qajetti shyǵyn kólemi 1,4 mlrd somnan asady.
Bul shyǵyndardy qarjylandyrý jyl saıyn respýblıkalyq bıýdjette qarastyrylyp, Qyrǵyz Respýblıkasynyń Oqý-aǵartý mınıstrligi men Ǵylym, joǵary bilim jáne ınnovatsııalar mınıstrligi arqyly júzege asyrylady.
Mınıstrlikter kelýshilerdiń tizimi negizinde esep júrgizip, tıisti qarajatty teatr jáne oıyn-saýyq mekemeleriniń shottaryna nemese tsıfrlyq tetikter arqyly oqýshylar men stýdentterdiń ózderine aýdarýdy qamtamasyz etedi.
Bastama jastardy shynaıy ónerge, onyń ishinde mýzeı, drama, qýyrshaq teatry, mýzyka, opera, balet jáne tsırk ónerine baýlýdy kózdeıdi. Buǵan jastardyń ınternet pen elektrondy oıyndarǵa táýeldiliginiń kúsheıýi sebep bolyp otyr.
Eske salaıyq, buǵan deıin Qyrǵyzstan astanasynda boı kótergen «Bishkek-Arena» stadıonynyń qurylysyna 386 mln dollar jumsalǵanyn jazǵanbyz.
