Qyrǵyzstanda nekege turmas buryn mindetti tekserýden ótýdi engizý usynyldy
BІShKEK. KAZINFORM – El parlamenti nekeni tirkeý kezinde medıtsınalyq tekserýden ótý anyqtamalarynyń mindetti túrde usynylýyn qarastyratyn zańnamalyq túzetýlerge bastamashy boldy, dep habarlaıdy Kazinform agenttiginiń Bishkektegi menshikti tilshisi.
Zań jobasy qoǵamdyq talqylaýǵa usynyldy.
Ózgertýlerge sáıkes, azamattarǵa nekege turmas buryn V, S jáne D vırýstyq gepatıti, AITV jáne jynystyq jolmen beriletin aýrýlarǵa mindetti túrde analız tapsyrý kiretin tegin medıtsınalyq tekserýden ótýin mindetteý usynylyp otyr.
Bolashaq jubaılarǵa arnalǵan skrınıngtik tekserý qorytyndylary – medıtsınalyq qupııa jáne bir-birine tek ózara kelisim boıynsha ashylýy múmkin.
Eger jubaılardyń biri ekinshisinen ózinde anyqtalǵan vırýstyq gepatıt, jynystyq jolmen beriletin aýrý nemese AITV ınfektsııasyn jasyrǵan bolsa, ekinshi jubaıy nekeni sot arqyly buza alady.
Atap ótilgendeı, bul sharalar azamattardyń sanaly sheshim qabyldaýyna, juqpaly aýrýlardyń taralý deńgeıin azaıtýǵa, halyq arasynda densaýlyq saqtaý saýattylyǵyn arttyrýǵa, jaýapkershilikti otbasylyq qarym-qatynas qalyptastyrýǵa, sondaı-aq áıelder densaýlyǵyn qorǵaýdy kúsheıtýge jaǵdaı jasaıdy.
Osyǵan deıin Qyrǵyzstanda turmystyq zorlyq-zombylyqpen kúres sharalaryn kúsheıtý maqsatynda tártip buzýshylarǵa elektrondy bilezikter qoldanýdy engizý usynylǵany habarlandy.
