Qyrǵyzstanda mopedter men skýterlerdi zańdastyrý usynyldy
ASTANA. KAZINFORM — Qyrǵyzstannyń Іshki ister mınıstrligi tıisti qujattary joq mopedterdi, skýterler men mototsıklderdi zańdastyrýdy usynyp otyr, dep habarlaıdy Kazinform agenttiginiń Bishkektegi menshikti tilshisi.
Prezıdent jarlyǵynyń tıisti jobasy qoǵamdyq talqylaýǵa shyǵaryldy.
Bul bastama mototehnıkany mindetti tirkeý týraly zań qabyldanǵannan keıin júrgizýshilerdiń kólik quraldaryn zańdastyrýyna múmkindik beretin ýaqytsha jeńildik retinde qarastyrylǵan.
Buǵan deıin kóptegen mehanıkalyq kólik quraly elge taýar retinde ákelingen. Sol kezeńdegi zań talaptarynyń ereksheligine baılanysty olardyń bir bóligi memlekettik tirkeýge qoıylmaǵan.
Qujatqa sáıkes, Qyrǵyzstanda naqty paıdalanylyp júrgen, qujattary joq ári 2026 jylǵy 8 qazanǵa deıin elge ákelingen mopedter, mototsıklder, ózdiginen júretin tehnıkalyq mashınalar jáne tehnıkalyq sıpattamalary uqsas basqa da kólik quraldary zańdastyrylady.
Jarlyq kúshine engen kúnnen bastap bir aı ishinde Mınıstrler kabıneti olardy bastapqy tirkeýden ótkizý tártibin bekitedi.
Sondaı-aq kólik quraldaryn tolyq zańdastyryp, barlyq rásimdi retteýge ıelerine tórt aı ýaqyt beriledi.
Rastaıtyn qujat bolmaǵan jaǵdaıda, resmı kún retinde avtomatty túrde 2026 jylǵy 7 qazan belgilenedi.
Zańdastyrý naýqany kezinde «A1» kishi sanaty boıynsha júrgizýshilerdi daıarlaý merzimi 30 kúntizbelik kúnge deıin qysqartylyp, avtomektepterde oqý aqysyna jeńildikter qarastyrylady.
Tórt aı ótken soń tirkeýden ótpegen kólik quraldary arnaıy aıypturaqtarǵa qoıylyp, sot sheshimimen kádege jaratylady.
Eske sala keteıik, buǵan deıin Qyrǵyzstanda róli oń jaqtan sol jaqqa aýystyrylǵan kólikterdi zańdastyrý usynylǵan bolatyn.
