Qyrǵyzstanda moped pen skýter júrgizýshilerine qatysty zań kúsheıtilýi múmkin

ASTANA. KAZINFORM — Qyrǵyzstanda jeńil motorly kólik quraldaryn paıdalanýdy retteý usynylyp otyr, dep habarlaıdy Kazinform tilshisi.

Osyǵan baılanysty tıisti zań jobasy qoǵamdyq talqylaýǵa shyǵaryldy.

Atalǵan jobada elde mopedter, skýterler jáne elektr skýterlerdi basqarý úshin júrgizýshi kýáligi men tirkeý talaptary joq ekeni aıtylǵan. Sonymen qatar, olardy júrgizýge ruqsat etiletin jas mólsheri de belgilenbegen, bul óz kezeginde jol qozǵalysyna kámeletke tolmaǵandardyń qaýipsizdigi tómen tehnıkany basqarýyna alyp kelip otyr.

Zań jobasyna sáıkes, saǵatyna 50 km-den joǵary jyldamdyqpen qozǵalatyn, qozǵaltqyshynyń kólemi 50 tekshe sm nemese elektr qozǵaltqyshynyń qýaty 4 kVt-tan asatyn kólik quraldaryn mindetti túrde tirkeý usynylady.

Jeke qozǵalýǵa arnalǵan quraldardy (JQQ) — qýaty 4 kVt-qa deıin jáne jyldamdyǵy 50 km/saǵ-qa deıin — basqarý úshin 14 jastan bastap beriletin «AM» sanatyndaǵy júrgizýshi kýáligin engizý kózdelip otyr. Budan bólek, «A1» sanaty 16 jastan, al «A» sanaty 18 jastan bastap beriletin bolyp qala beredi.

Bastamashynyń pikirinshe, zań jobasyn qabyldaý jeke qozǵalýǵa arnalǵan quraldarmen baılanysty jol-kólik oqıǵalaryn azaıtýǵa, paıdalaný barysyndaǵy baqylaý men jaýapkershilikti arttyrýǵa, jaıaý júrginshiler men ózge de jol qozǵalysyna qatysýshylardy qorǵaýǵa, sondaı-aq zańnamany qazirgi zaman talaptary men halyqaralyq standarttarǵa beıimdeýge múmkindik beredi.

Osyǵan deıin Qyrǵyzstan elektrli samokat pen skýterlerge arnalǵan jol júrý erejesin ázirlegeni aıtyldy.