Qyrǵyzstanda mıneraldy tyńaıtqyshtardy eksporttaýǵa ýaqytsha shekteý engizildi
ASTANA. KAZINFORM — Qyrǵyz Respýblıkasynda EAEO keden aýmaǵynan tys mıneraldy tyńaıtqyshtardy shyǵarý boıynsha alty aılyq ýaqytsha tyıym engizildi, dep habarlaıdy Kabar Qyrǵyz Respýblıkasy premer-mınıstriniń baspasóz qyzmetine silteme jasap.
Bul sheshimge Qyrǵyz Respýblıkasynyń premer-mınıstri Adylbek Kasymalıev qol qoıdy.
— Tyıym buryn úshinshi elderden ákelingen jáne sapasy talapqa saı emestigi anyqtalǵan mıneraldy tyńaıtqyshtarǵa qoldanylmaıdy, — delingen habarlamada.
Tıisti memlekettik organdarǵa belgili bir túrdegi mıneraldy tyńaıtqyshtardyń zańsyz eksportyn boldyrmaýǵa baǵyttalǵan qajetti sharalardy qabyldaý tapsyryldy.
Osyǵan deıin Qyrǵyzstan sanıtarııalyq qorǵaý erejeleri men 2026–2030 jyldarǵa arnalǵan is-qımyl josparyn jańartyp jatqanyn jazǵan bolatynbyz.