Qyrǵyzstanda memlekettik tóńkeris jasamaq bolǵan bir top adam qolǵa tústi

ASTANA. KAZINFORM – Qyrǵyz Respýblıkasynyń Ulttyq qaýipsizdik memlekettik komıtetiniń qyzmetkerleri eldiń turaqtylyǵyna qaýip tóndirýi múmkin memlekettik tóńkeris jasaý áreketiniń jolyn kesti, dep jazdy Anadoly 24.kg aqparat agenttigine silteme jasap habarlady.

Málimdemede aıtylǵandaı, bir top adam qoldan jasalǵan beınematerıaldardy paıdalanyp, ultaralyq alaýyzdyq pen áleýmettik narazylyq tolqynyn týdyrýdy kózdegen.

Atap aıtqanda, arandatýshy vıdeo taratý josparlanǵan, onda sheteldikter jartylaı jalańash qyrǵyz qyzyn uryp jatqan kórinis berilýi tıis bolǵan.

UQMK-niń málimdeýinshe, mundaı jalǵan aqparat taratýdyń maqsaty — «patrıottyq sezimdi qozdyrý» jáne «jastardy jappaı narazylyq aktsııalaryna jumyldyrý» bolǵan.

— Qaýipsizdikti qamtamasyz etý, konstıtýtsııalyq qurylymdy jáne azamattardyń quqyqtaryn qorǵaý maqsatynda UQMK ulttyq arazdyqty qozdyrý áreketterin, ıaǵnı jergilikti janjal shǵaryp, onyń arty jappaı narazylyqqa ulasýyna jol bermeý sharalaryn qolǵa aldy, — delingen vedomstvo habarlamasynda.

Mekemeniń málimetinshe, bul arandatýlardyń artynda aldyn ala josparlanǵan stsenarıımen áreket etken top turǵan.

Jalǵan aqparat taratyp qana qoımaı, arnaıy daıyndyqtan ótken, qarýmen jabdyqtalǵan toptardy qatarǵa qosý josparlanǵan.

Uıymnyń basty maqsaty — shetel azamattary turyp jatqan jáne jumys isteıtin aýdandarda qaqtyǵystardy arandatý, sondaı-aq quqyq qorǵaý organdarynyń ókilderine shabýyl jasaý bolǵan.

Qyrǵyzstandyq BAQ-tyń habarlaýynsha, bul tártipsizdikterdiń modeli 2024 jyldyń mamyrynda Bishkekte bolǵan oqıǵalarǵa uqsas, sol kezde Ońtústik-Shyǵys Azııadan shyqqan azamattar jappaı tóbelesten zardap shegip, tonalǵan edi. 

— Barlyq áreketter memlekettik organdardy qaralaý jáne eldiń qazirgi basshylyǵyna degen senimdi álsiretýge baǵyttalǵan. Syrttan úılestirilip, qarjylandyrylatyn aýqymdy narazylyqtar úshin jaǵdaı jasaý josparlanǵan, — dep atap ótti vedomstvo.

Operatıvtik is-sharalar toptyń áreketin der kezinde anyqtap, onyń jolyn kesýge múmkindik berdi.

Arnaıy qyzmettiń málimetinshe, Qyrǵyzstan aýmaǵynda áreket etken qatysýshylar ustaldy. Alaıda uıymdastyrýshylardyń biri, aldyn ala boljam boıynsha, Birikken Arab Ámirlikterinde (BAÁ) bolýy múmkin.

— UQMK eldegi jaǵdaıdy turaqsyzdandyrýǵa baǵyttalǵan kez kelgen áreketterge qatań tosqaýyl qoıyp otyrady jáne azamattardy ultaralyq tatýlyq pen konstıtýtsııalyq tártipti buzýǵa baǵyttalǵan arandatýlarǵa ermeýge shaqyrady, — delingen málimdemede.

Eske sala keteıik, buǵan deıin Qyrǵyzstanda raqymshylyq qoldanylmaıtyn qylmystar tizimi keńeıtilgenin jazǵan bolatynbyz.