Qyrǵyzstanda memlekettik organdardyń qyzmetin baǵalaý júıesi engizildi

BІShKEK. KAZINFORM – El úkimeti memlekettik basqarýdyń tıimdiligin baǵalaý úshin «Pikirler» aqparattyq júıesin engizdi, dep habarlaıdy Kazinform menshikti tilshisi.

Aqparattyq alań azamattarǵa kórsetiletin memlekettik qyzmetterdiń sapasyn baǵalaýǵa jáne usynystar engizýge, memlekettik organdardyń ókilderimen ózara árekettesý kezinde oryn alǵan zańbuzýshylyqtar nemese qıyndyqtar týraly jedel habardar etýge jáne memlekettik organdardyń problemalyq máselelerdi jedel anyqtaýyna jáne joıýyna múmkindik beredi.

Qyrǵyz Respýblıkasy Prezıdentiniń Ákimshiligi memlekettik organdar qyzmetiniń tıimdiligine turaqty monıtorıng júrgizip, azamattardyń pikirlerin ýaqtyly qaraýdy baqylaıdy jáne olardyń ótinishteri elenbegen jaǵdaıda sharalar qabyldaıdy.

Qyrǵyz Respýblıkasy Mınıstrler Kabınetiniń basshysy Adylbek Qasymalıev memlekettik organdardyń basshylaryna pikir jiberý úshin tıisti QR siltemelerin keńinen ornalastyrýdy qamtamasyz etýdi tapsyrdy.

Buǵan deıin Qyrǵyzstandaǵy ortasha jalaqy mólsheri anyqtalǵanyn jazǵan bolatynbyz.