Qyrǵyzstanda Memlekettik kúzet qyzmeti quryldy

ASTANA. KAZINFORM – Qyrǵyzstanda Ulttyq qaýipsizdik memlekettik komıtetiniń 9-shy qyzmetiniń negizinde Prezıdent janyndaǵy Memlekettik kúzet qyzmeti quryldy, dep habarlaıdy Kazinform agenttiginiń tilshisi.

Prezıdent qol qoıǵan jarlyqqa sáıkes arnaıy memlekettik organ prezıdentke tikeleı baǵynady jáne oǵan esep beredi. MKU basshysyn jáne onyń orynbasarlaryn memleket basshysy qyzmetke taǵaıyndaıdy jáne qyzmetten bosatady. Memlekettik kúzet qyzmeti týraly erejeni, onyń shtat sany men qurylymyn Prezıdent bekitedi. 

Shekara qyzmeti Qyrǵyz Respýblıkasynyń Ulttyq qaýipsizdik memlekettik komıtetinen bólinip, Qyrǵyz Respýblıkasynyń táýelsiz Memlekettik shekara qyzmetine aınaldyrǵany da aıtyldy. Jańa agenttikke Ábdikárim Álimbaev jetekshilik etedi. 

Qyrǵyz Respýblıkasy Prezıdentiniń baspasóz qyzmetiniń habarlaýynsha, Ulttyq qaýipsizdik memlekettik komıtetinde kelesi kadrlyq taǵaıyndaýlar boldy: 

• Rýstam Mamasadyqov Qyrǵyz Respýblıkasy Qaýipsizdik keńesiniń hatshysy qyzmetinen bosatylyp, Ulttyq qaýipsizdik memlekettik komıteti tóraǵasynyń birinshi orynbasary bolyp taǵaıyndaldy; 

• Uranbek Shadybekov Ulttyq qaýipsizdik memlekettik komıteti tóraǵasynyń orynbasary – Ulttyq qaýipsizdik memlekettik komıtetiniń Kıberqaýipsizdik jónindegi úılestirý ortalyǵynyń dırektory bolyp taǵaıyndaldy; 

• Álisher Erbaev Ulttyq qaýipsizdik memlekettik komıteti tóraǵasynyń orynbasary – Ulttyq qaýipsizdik memlekettik komıtetiniń Terrorızmge qarsy ortalyǵynyń dırektory bolyp taǵaıyndaldy. 

Eske sala keteıik, buǵan deıin Qyrǵyzstannyń UQMK basshylyq quramynda aýys-túıis bolǵanyn jazǵan edik.