Qyrǵyzstanda memlekettik qyzmetshilerge qosymsha jumys isteýge ruqsat berildi
ASTANA. KAZINFORM — Qyrǵyzstanda memlekettik qyzmetshilerdiń jekelegen sanatyna negizgi qyzmetinen bólek, óz kásibı baǵyty boıynsha qosymsha aqyǵa jumys isteýge ruqsat berildi, dep habarlaıdy Kazinform agenttiginiń Bishkektegi menshikti tilshisi.
Prezıdenttiń tıisti jarlyǵyna ózgerister engizildi.
Bul ereje saıası memlekettik, arnaýly memlekettik jáne saıası mýnıtsıpaldyq laýazymdardy atqaratyn tulǵalarǵa qoldanylady.
Jarlyqqa sáıkes, laýazymdy tulǵalarǵa tıisti kásibı salasy boıynsha bilim berý, sarapshylyq, ǵylymı jáne ózge de shyǵarmashylyq qyzmetpen aınalysýǵa ruqsat etiledi. Bul jumysy zańnamada tyıym salynbaǵan qarajat kózderinen tólenip, oǵan laýazymdy tulǵany qyzmetke taǵaıyndaǵan adamnyń kelisimi berilýge tıis. Mundaı qyzmet negizgi jumystyń kólemi men sapasyna keri áser etpeýge jáne múddeler qaqtyǵysyna jol bermeýge tıis.
Sonymen qatar memlekettik qyzmetshilerge densaýlyq saqtaý, bilim berý, qaıyrymdylyq jáne volonterlik salalarda qoǵamdyq paıdaly qyzmet atqaratyn qoǵamdyq birlestikterdiń jumysyna qatysýǵa ruqsat etiledi.
Budan bólek memlekettik qyzmetshini eńbek demalysynan merziminen buryn tek onyń telefony arqyly, tsıfrlyq nemese ózge de baılanys arnalary arqyly berilgen kelisimimen ǵana shaqyrtyp alýǵa bolady.
Buǵan deıin Qyrǵyzstanda jalaqy ınflıatsııaǵa qaraı ósetini habarlanǵan bolatyn.