Qyrǵyzstanda memlekettik qyzmetkerlerdiń jalaqysy artady

ASTANA. KAZINFORM — Qyrǵyzstanda 1 qyrkúıekten bastap memlekettik qyzmetkerler men jergilikti ózin-ózi basqarý qyzmetkerleriniń jalaqysy ósedi, dep habarlaıdy Kabar.

Bıylǵy jyldyń 1 qyrkúıeginen bastap memlekettik organdar, jergilikti ózin-ózi basqarý jáne óńirlik bólimsheler qyzmetkerleriniń jalaqysyn arttyrý josparlanyp otyr. Bul týraly Qyrǵyzstan prezıdenti Sadyr Japarov Osh qalasynda turǵyndarmen kezdesý barysynda málimdedi.

Onyń aıtýynsha, eń aldymen bıýdjet salasy qyzmetkerleriniń — muǵalimderdiń, dárigerlerdiń, memlekettik jáne mýnıtsıpaldyq qyzmetkerlerdiń, sondaı-aq áskerı qyzmetshilerdiń jalaqysyn kóterý jumystary júrgizilip jatyr.

— Osy aıdyń sońyna deıin muǵalimder, dárigerler, mádenıet jáne sport salasynyń qyzmetkerleri 100%-ǵa ósirilgen jalaqy alady. Bul sharalar jergilikti jerlerdegi memlekettik mekemelerdiń jumysyn jaqsartý úshin qolǵa alynyp otyr, — dedi memleket basshysy.

Sonymen qatar, Sadyr Japarov zeınetaqy júıesinde turaqty ósim baıqalyp otyrǵanyn atap ótti.

— Eger 2021 jyly zeınetkerlerdiń 49%-y eń tómengi kúnkóris deńgeıinen tómen zeınetaqy alsa, búginde 95%-y osy deńgeıden joǵary alady. Biz munymen toqtamaımyz. Álemdegi baǵanyń ósýi men jahandyq daǵdarystarǵa baılanysty jalaqy men zeınetaqyny arttyrý — basym baǵyttardyń biri bolyp qala beredi, — dedi prezıdent.

Osydan buryn Qyrǵyzstanda aýyl sharýashylyǵy qyzmetkerleriniń jalaqysy ósetinin jazǵan bolatynbyz.