Qyrǵyzstanda medıtsına qyzmetkerleriniń jalaqysy 100%-ǵa ósedi
ASTANA. KAZINFORM — Qyrǵyzstanda 1 sáýirden bastap medıtsına salasy qyzmetkerleriniń jalaqysy 100%-ǵa artady, dep habarlaıdy Kabar.
Bul týraly Qyrǵyz Respýblıkasy prezıdentiniń baspasóz hatshysy Askat Alagozov málimdedi.
Onyń aıtýynsha, memleket basshysy Sadyr Japarov buǵan deıin dárigerlerge qoldaý kórsetip, olardyń eńbekaqysyn arttyrý týraly tapsyrma bergen.
Qazirgi tańda bul baǵytta júıeli jumys júrgizilýde: aýrýhanalardaǵy kadr tapshylyǵyn azaıtý jáne medıtsınalyq mekemelerge túsetin júktemeni tómendetý boıynsha sharalar qabyldanyp jatyr.
Sonymen qatar dárigerlerdiń qoǵamdaǵy rólin joǵary baǵalaı otyryp, memleket basshysy olarǵa áleýmettik jaǵdaıyn jaqsartý maqsatynda jeńildetilgen ıpoteka arqyly baspana alýǵa basymdyq berýdi tapsyrǵan.
Mysaly, qazir eńbek jolyn endi bastaǵan jas dárigerler 13 581 som alsa, sáýirden bastap olardyń jalaqysy 35 248 somǵa deıin ósedi. Al tájirıbesi mol dárigerlerdiń eńbekaqysy budan da joǵary bolady. Eńbek ótili úshin qosymsha ústemaqylar saqtalady.
Budan bólek, shalǵaı jáne taýly aımaqtarda jumys isteýge daıyn dárigerlerdiń jalaqysy orta eseppen taǵy 30%-ǵa ulǵaıady.
«Dáriger depozıti» baǵdarlamasy aıasynda memleket dárigerlerge toqsan saıyn 66 myń som tólep otyr.
Suranysqa ıe mamandyqtar boıynsha (pedıatr, neonatolog, anestezıolog, reanımatolog, jalpy hırýrg) jumys isteıtin jas dárigerlerge aı saıyn qosymsha 20 myń som beriledi.
Sondaı-aq eldegi 28 myń medbıkeniń jalaqysy 8 541 somnan 29 053 somǵa deıin, ıaǵnı shamamen úsh esege ósedi (qosymsha tólemder men ústemaqylardy eseptemegende).
Qazirgi ýaqytta eldiń medıtsınalyq mekemelerinde túrli mamandyqtaǵy dárigerlerge suranys bar. Jalpy bos jumys oryndarynyń sany — 1596.
Baspasóz hatshysy medıtsınalyq oqý ornyn jańa bitirgen nemese buryn medıtsına salasynda jumys istep, qaıta oralǵysy keletin azamattardy jaqyn mańdaǵy aýrýhanalarǵa baryp, bos oryndar týraly aqparat alýǵa shaqyrdy.
Aıta ketelik Qyrǵyzstanda aýyl sharýashylyǵy sanaǵy bastalǵany týraly jazǵan edik.