Qyrǵyzstanda máıitti ruqsatsyz jerlegender men eksgýmatsııa jasaǵandarǵa jaza kúsheıtilmek
ASTANA. KAZINFORM — Qyrǵyzstanda tıisti ruqsatynsyz marqumdy óz betinshe jerleýge, buryn jerlengen qabirge taǵy bir máıitti qoıýǵa, múrdeni ózge jerge kóshirýge jáne eksgýmatsııalaýǵa baılanysty qylmystyq jaýapkershilik engiziledi. Bul týraly Kazinform agenttiginiń Bishkektegi menshikti tilshisi habarlaıdy.
Bishkek ákimdigi ázirlegen zań jobasy qoǵamdyq talqylaýǵa usynyldy.
Bul bastama QR Qylmystyq kodeksindegi «Marqumnyń denesi men jerlengen jerin qorlaý» týraly 164-bapty jańa bólikpen tolyqtyrýdy kózdeıdi. Óıtkeni qoldanystaǵy zańnamada mundaı áreketter úshin arnaıy qylmystyq norma qarastyrylmaǵan.
Qujatqa sáıkes, jerleý tártibin buzǵandarǵa tómendegi jazalardyń biri taǵaıyndalýy múmkin:
• 50 myńnan 100 myń somǵa deıingi aıyppul (260 myńnan 520 myń teńgege deıin);
• 80-nen 200 saǵatqa deıin qoǵamdyq jumystarǵa tartý;
• 3 jylǵa deıin bas bostandyǵyn shekteý;
• 3 jylǵa deıin bas bostandyǵynan aıyrý.
Buǵan deıin Qyrǵyzstanda qaıtys bolǵandarǵa tas jáne mármárdan eskertkish qoıyp, qulpytas ornatýǵa tyıym salynǵanyn habarlaǵan bolatynbyz.
Aqzat Jıenalına
