Qyrǵyzstanda mas júrgizýshi kólikti sýǵa qulatyp, 6 bala kóz jumdy

BІShKEK. KAZINFORM — Qyrǵyzstanda kólik toǵanǵa qulap, salondaǵy segiz balanyń altaýy sýǵa batyp ketti, dep jazady 24.kg.

Oqıǵa keshe, 20 maýsym keshke Qara Balta aýyly mańynda bolǵan. Volkswagen Jetta júrgizýshisi kólikti basqara almaı, joldan shyǵyp toǵanǵa qulaǵan. 

Kólikte úsh eresek pen segiz bala bolǵan. Tórt pen toǵyz jas aralyǵyndaǵy alty bala sýǵa batyp ketti. Olardyń bári — bir otbasynyń músheleri.

Qara Baltanyń 40 jastaǵy turǵyny áıeli jáne tórt balasymen birge № 3 toǵanǵa demalýǵa kelgen. Olardyń janynda er adamnyń ápkesi jáne onyń tórt balasy — bas-aıaǵy úsh eresek jáne segiz bala bolǵan. 

Demalystan qaıtyp kele jatqanda júrgizýshi kólik rýline ıe bola almaı, sýǵa qulaıdy. Kólik júrgizgen adam mas bolǵan.    

Júrgizýshi, onyń áıeli, úsh aılyq qyzy, er adamnyń ápkesi jáne onyń jeti jasar qyzy aman qaldy. Olar aýrýhanaǵa jetkizildi.

Sot-quqyqtyq saraptama taǵaıyndaldy. Tergeý aıasynda júrgizýshi ustaldy.

Shý oblysynyń ishki ister basqarmasy júrgizýshiniń balalardy «shomylýǵa bolmaıdy» degen belgisi bar jerge ákelip, onymen qoımaı mas bolyp kólikke otyrǵanyn, osy jaǵdaı olardyń ólimine ákelgenin habarlady.  

Er adam qamaýda otyr. Tergeý jalǵasýda.