Qyrǵyzstanda mal eksportyna ýaqytsha tyıym salyndy
BІShKEK. KAZINFORM – Elde aýylsharýashylyq janýarlaryn áketýge ruqsat berý toqtatyldy.
Qyrǵyzstan Respýblıkasy Sý resýrstary, aýyl sharýashylyǵy jáne óńdeý ónerkásibi mınıstrliginiń málimetinshe, 31 qańtardan bastap vedomstvoǵa qarasty veterınarlyq qyzmet iri qara, usaq maldy, sondaı-aq jylqy malyn úshinshi elderge eksporttaýǵa ruqsat berýdi toqtatty.
- 2025 jyldyń 31 qańtaryna deıin berilgen ruqsattar barlyq tekserýler aıaqtalǵansha jáne normatıvtik quqyqtyq bazaǵa ózgerister engizilgenge deıin ýaqytsha toqtatyldy. Ruqsat berý protsesiniń qaıta jandanǵany týraly qosymsha habarlanady, - delingen habarlamada.
Eske sala ketsek, 2024 jyldyń qyrkúıeginde Qyrǵyzstan «Janýarlardy sáıkestendirý jáne qadaǵalaý» júıesinde aýylsharýashylyq janýarlaryn sáıkestendirýdi túgendeýge baılanysty mal eksportyn ýaqytsha toqtatqan bolatyn.