Qyrǵyzstanda lıtsenzııasyz taksısterge aıyppul salý bastalady

ASTANA. KAZINFORM — Qyrǵyz Respýblıkasynda 2025 jylǵy 22 tamyzdan bastap barlyq taksısterge lıtsenzııa alý mindetteletin zań kúshine enedi, dep habarlaıdy Kazinform agenttiginiń menshikti tilshisi.

Qyrǵyzstan ІІM Ákimshilik polıtsııa basqarmasynyń kólik qyzmetin lıtsenzııalaý jáne tehnıkalyq baqylaý bóliminiń basshysy Nýrdın Sambaevtyń aıtýynsha, lıtsenzııany el boıynsha kez kelgen Ákimshilik polıtsııa bólimshesinen alýǵa bolady.

Jańa zańnyń basty maqsaty – jolaýshylardyń qaýipsizdigin qamtamasyz etý. Jyldyq lıtsenzııa quny jeke tulǵalarǵa 500 som, zańdy tulǵalarǵa 1000 som. Lıtsenzııasyz jolaýshylardy tasymaldaǵany úshin aıyppul qarastyrylǵan: jeke tulǵalarǵa – 7 500 som, zańdy tulǵalarǵa – 23 myń som.

Sonymen qatar, zańǵa sáıkes, oń jaq róldi kólikterdi paıdalanýshylarǵa jolaýshylardy tasymaldaý úshin lıtsenzııa berilmeıdi, mundaı qyzmetter olarǵa tyıym salynǵan.

— 22 tamyzdan bastap el boıynsha oń jaq róldi kólikterge qatysty aýqymdy reıdter júrgiziledi. Oń jaq róldi kólik júrgizýshilerine taksıster retinde jumys isteýge ruqsat joq. Mundaı kólikter tek jeke paıdalaný úshin ǵana arnalǵan, — dep túsindirdi Nýrdın Sambaev.

Sonymen birge ol lıtsenzııa alýshy júrgizýshiler kem degende úsh jyl tájirıbege ıe bolýy, medıtsınalyq tekserýden ótken bolýy, tehnıkalyq jaǵynan jaramdy kólik paıdalanýy jáne resmı tirkelgen kompanııamen qyzmet kórsetý kelisimshartyn jasaýy kerek ekenin atap ótti.

Esterińizge salsaq, buǵan deıin Qyrǵyzstan sheteldik nómirleri bar kólikterdi zańdastyrýǵa shaqyrǵany týraly jazǵan edik.