Qyrǵyzstan qurylys salasynan tender júıesin alyp tastaýdy kózdep otyr

BІShKEK. KAZINFORM – Jogorký Kenesh tóraǵasy Nurlanbek Turǵynbekýýlý úkimetti qurylystaǵy memlekettik satyp alýdy júzege asyrý kezinde tender júıesinen tolyǵymen bas tartýǵa shaqyrdy, dep habarlaıdy Kazinform menshikti tilshisi.

Parlament spıkeriniń pikirinshe, tenderlik protsedýralar mektepter men balabaqshalar sııaqty áleýmettik mańyzy bar nysandardyń qurylysyn aıtarlyqtaı baıaýlatady, bul halyq narazylyǵyn týdyryp otyr.

- Mektep, balabaqsha nemese basqa da qoǵamdyq ǵımarat – qandaı qurylys jobasy bolmasyn, olardyń barlyǵy tender ótkizýmen baılanysty. Adamdar budan sharshady. Tender ótkizý protsesi eki-úsh aıǵa sozylady, al qurylys jumystary keshiktiriledi. Sondyqtan tenderlerge qatysty zańdardy qaıta qaraýymyz kerek. Tenderler bolmaýy kerek. Bul shara jumystyń tez jáne sapaly aıaqtalýyna yqpal etedi, - dedi ol.

Nurlanbek Turǵynbekýýlý zańnamany qaıta qaraý qajet dep sanaıdy jáne bul máseleni prezıdentpen talqylady.

Tóraǵa mınıstrler kabınetin tender ótkizý protsedýrasyn joıý týraly zań jobasyn shuǵyl túrde Jogorký Keneshke (Parlamentke) usynýǵa shaqyrdy.

- Bul másele eki jyl buryn kóterilgen bolatyn. Sol kezde ataýy ǵana ózgertilgen, biraq máni sol kúıinde qaldy. Máseleni eń qysqa merzimde sheshý kerek. Qurylysty tendersiz júrgizip, tikeleı satyp alý júzege asyrylýy kerek. Qatelikter jiberilgen jaǵdaıda tıisti mekemelerdiń basshylary jaýapqa tartylady, - dep qosty ol.

Buǵan deıin Qyrǵyzstan mas kúıde kólik júrgizgenderge jazany kúsheıtpekshi ekenin habarlaǵan bolatynbyz.