Qyrǵyzstanda qýaty 15 MVt bolatyn qalqymaly kún elektr stantsııasy salynady
ASTANA. KAZINFORM – Qyrǵyzstan Energetıka mınıstrligi GES-5 sý elektr stantsııasynyń sý qoımasynda qýaty 15 MVt bolatyn qalqymaly kún elektr stantsııasyn salýdy josparlap otyr. Bul týraly Kabar agenttigi habarlady.
Mınıstrliktiń málimetinshe, joba Azııa damý bankimen (ADB) jasalǵan yntymaqtastyq týraly memorandým aıasynda júzege asyrylyp jatyr. Qazirgi ýaqytta joba boıynsha keńesshini irikteý jumystary júrgizilip jatyr.
Azııa damý bankiniń CSRN portalynda jarııalanǵan tenderge túrli elden 22 kompanııa ótinim bergen. Aldyn ala irikteý nátıjesinde olardyń altaýy óz usynystaryn usynýǵa shaqyrylǵan.
Aıta keteıik, GES-5 qalqymaly kún elektr stantsııasyn paıdalaný tájirıbesine ıe. Munda qýaty 0,1 MVt bolatyn pılottyq fotoelektr stantsııasy 2024 jylǵy 1 naýryzda iske qosylǵan.
Ol 2024 jyly 133,9 myń kVt/saǵat, 2025 jyly 141,1 myń kVt/saǵat elektr energııasyn óndirgen. Al 2026 jyldyń alǵashqy on aıynda 132,5 myń kVt/saǵat elektr energııasy óndirildi.
– Kún panelderin sý betine ornalastyrý jer resýrstaryn únemdeýge, sýdyń býlanýyn azaıtýǵa jáne sý elektr stantsııalarynyń qoldanystaǵy ınfraqurylymyn tıimdi paıdalanýǵa múmkindik beredi, – delingen mınıstrlik habarlamasynda.
Eske sala ketsek, Qyrǵyzstanda álemdegi eń uzyn aspaly shyny kópir salynatynyn jazdyq.
