Qyrǵyzstanda Kóshpendiler oıyndarynyń 700 volonteri arnaıy kıimmen qamtyldy
ASTANA. KAZINFORM — 25 tamyzda Mádenıet, aqparat jáne jastar saıasaty mınıstrliginde VI Dúnıejúzilik kóshpendiler oıyndarynyń volonterlerine 700 arnaıy kıim jıyntyǵyn tabystaý rásimi ótti, dep habarlady Kabar vedomstvonyń baspasóz qyzmetine silteme jasap.
Vedomstvonyń málimetinshe, volonterlerge arnalǵan arnaıy kıim Dúnıejúzilik kóshpendiler oıyndarynyń hatshylyǵymen birlesip ázirlengen.
Rásimde mınıstrdiń birinshi orynbasary Soıýzbek Nadyrbekov sóz sóılep, VI Dúnıejúzilik kóshpendiler oıyndaryn joǵary deńgeıde uıymdastyrýda volonterlerdiń mańyzdy ról atqaratynyn atap ótti.
Onyń aıtýynsha, volonterler sheteldik qonaqtar men Oıyndarǵa qatysýshylardy alǵashqylardyń biri bolyp qarsy alady. Osy arqyly olar Qyrǵyzstan týraly alǵashqy jaǵymdy áser qalyptastyrýǵa eleýli úles qosady.
Sóz sońynda Nadyrbekov Dúnıejúzilik kóshpendiler oıyndaryn uıymdastyrýǵa atsalysyp jatqan barlyq taraptar men seriktesterge alǵys aıtyp, volonterlerge zor densaýlyq, kúsh-qýat, tabys jáne kóterińki kóńil-kúı tiledi.
Aıta keteıik, VI Dúnıejúzilik kóshpendiler oıyndary 2026 jylǵy 1-6 qyrkúıek aralyǵynda Ystyqkól oblysynda ótedi. Oıyndarǵa álemniń ár túkpirinen sportshylar, mádenıet ókilderi, qonaqtar men týrıster qatysady.
Osyǵan deıin Dúnıejúzilik kóshpendiler oıyndaryna Mońǵolııadan 135 sportshy men jattyqtyrýshy qatysatynyn jazǵanbyz.
Sondaı-aq 2026 jylǵy Dúnıejúzilik kóshpendiler oıyndarynyń talısmany retinde ilbis tańdalǵany habarlanǵan edi. Oǵan Bataı degen esim berildi.
Qyrǵyzstannyń Dene shynyqtyrý jáne sport jónindegi memlekettik agenttiginiń málimetinshe, VI Dúnıejúzilik kóshpendiler oıyndarynda kók bóri men kókpar jarystary jeke-jeke sporttyq dıstsıplına retinde ótkiziledi.
Qyrǵyzstandaǵy Kóshpendiler oıyndaryna kórermenderdi 300 avtobýs tegin jetkizetini aıtyldy.
Budan bólek VI Dúnıejúzilik kóshpendiler oıyndaryna kirý quny belgili boldy.
