Qyrǵyzstanda qoryqtar men jaǵalaýlarda kvadrotsıkl júrgizýge tyıym salynýy múmkin

ASTANA. KAZINFORM — Qyrǵyzstannyń Tabıǵı resýrstar, ekologııa jáne tehnıkalyq qadaǵalaý mınıstrligi erekshe qorǵalatyn tabıǵı aýmaqtar men sý aıdyndarynyń jaǵalaýyndaǵy aımaqtarda kvadrotsıklderdi paıdalanýǵa tyıym salýdy usynyp otyr.

Kabar taratqan aqparatqa sáıkes, bul bastama tıisti qaýly jobasy arqyly qoǵamdyq talqylaýǵa shyǵaryldy.

Qaýly kúshine engen jaǵdaıda, kvadrotsıklderdiń qoryqtarda, saıabaq jaǵajaılarynda jáne sý qorǵaý aımaqtarynda qozǵalýyna tyıym salynady.

Tek qyzmettik, izdestirý-qutqarý jáne órt sóndirý jumystaryna nemese mınıstrlikpen kelisilgen is-sharalarǵa ǵana ruqsat beriledi.

Mınıstrliktiń málimetinshe, sońǵy jyldary kvadrotsıklderdiń týrıstik jáne oıyn-saýyq maqsatynda shamadan tys qoldanylýy tabıǵı ortaǵa úlken zııan keltirip otyr.

Bul kólik quraldary topyraqtyń buzylýyna, ósimdikterdiń joıylýyna, sý aıdyndarynyń lastanýyna, sondaı-aq janýarlar men qustardyń tirshiligine keri áserin tıgizip jatyr.

Sonymen qatar, taýly jáne dalalyq aımaqtardaǵy osal ekojúıelerge kvadrotsıklder orny tolmas zalal keltirip, tabıǵı qalpyna kelý úderisin ondaǵan jyldarǵa tejeıdi.

Sý mańyndaǵy qozǵalys sý sapasynyń nasharlaýyna, jaǵalaýlardyń shaıylýyna jáne ýytty zattardyń sý ekojúıesine taralýyna sebep bolýy múmkin.

Budan buryn habarlanǵandaı, 2025 jylǵy 1 maýsymdaǵy jaǵdaı boıynsha Qyrǵyzstanda 1 mıllıon 778 myń 901 kólik quraly tirkelgen.