Qyrǵyzstanda kómirdiń baǵasyn memleket tarapynan retteý toqtatyldy

BІShKEK. KAZINFORM – Kómirdiń baǵasyn ýaqytsha retteý týraly Qyrǵyzstan Mınıstrler kabınetiniń qaýlysy kúshin joıdy, dep habarlaıdy Kazinform agenttiginiń tilshisi.

Monopolııaǵa qarsy retteý qyzmetiniń málimetinshe, 15 aqpanǵa deıin memleket aımaqtardaǵy kómirdiń shekti qunyn belgilegen bolatyn. Bul rette tıisti organdar óńirlerde 560 tekserý júrgizip, onyń nátıjesinde 800-den astam baǵany negizsiz kóterý faktisin anyqtady.

Buǵan deıin Qyrǵyzstan úkimeti kómirdiń qunyn memleket tarapynan retteý merzimin birneshe ret uzartqan edi. Keıingi ret tıisti qaýly byltyr 15 jeltoqsanda qabyldanyp, bıyl 15 aqpanda kúshin joıdy.

Eske salaıyq, Qazaqstanda aqpan aıynan janar-jaǵarmaı baǵasyn memlekettik tarapynan retteý toqtady. Tıisinshe, benzın, dızel, suıytylǵan gaz baǵasy ósedi.