Qyrǵyzstanda kómirdi kólikpen shyǵarýǵa ýaqytsha tyıym salyndy

ASTANA. KAZINFORM — Qyrǵyz Respýblıkasy kómir eksportyna alty aılyq shekteý engizdi, dep habarlaıdy Kabar.

— Qyrǵyz Respýblıkasy Mınıstrler kabıneti Qyrǵyz Respýblıkasynyń aýmaǵynan kómirdi (EAEO TN VED kodtary 2701 jáne 2702 boıynsha jikteletin) avtokólikpen shyǵarý boıynsha alty aı merzimge ýaqytsha tyıym salý týraly sheshim qabyldady. Bul tyıym «Irkeshtam-avtokólik» jáne «Torýgart-avtokólik» ótkizý pýnktterine qoldanylmaıdy, — delingen habarlamada.

Atalǵan sheshimge Qyrǵyz Respýblıkasy Mınıstrler kabınetiniń tóraǵasy Adylbek Qasymalıev qol qoıdy. Qujatqa sáıkes, tıisti memlekettik organdar bul sheshimnen týyndaıtyn qajetti sharalardy belgilengen tártippen qabyldaýǵa mindetteledi.

Aıta keteıik, bul sheshim resmı jarııalanǵan kúnnen bastap on bes kún ótken soń kúshine enedi.

Osyǵan deıin Qyrǵyzstan azamattaryna AQSh-qa kirýge tyıym salynýy múmkin ekeni aıtyldy.