Qyrǵyzstanda kómir baǵasyna memlekettik baqylaý engizildi
ASTANA. KAZINFORM — Qyrǵyzstanda 22 qazannan bastap kómir baǵasy 90 kún boıy memlekettik baqylaýǵa alyndy, dep habarlaıdy Kazinform agenttiginiń Bishkektegi menshikti tilshisi.
Bul shara Ekonomıka jáne kommertsııa mınıstrliginiń 21 qazandaǵy №219 buıryǵymen bekitildi. Naryqtaǵy jaǵdaıǵa qaraı shekteý merzimi uzartylýy múmkin.
Sonymen qatar Qyrǵyzstannyń Monopolııaǵa qarsy retteý qyzmeti kómirdiń bólshek saýdadaǵy shekti baǵasyn ár oblys pen Bishkek jáne Osh qalalary úshin bólek esepteıdi.
Monopolııaǵa qarsy retteý qyzmetiniń óńirlik bólimsheleri belgilengen baǵanyń saqtalýyn qadaǵalaıdy. Budan bólek kómir bazalary men satý oryndarynda baǵa kórsetkishteri men tekserilgen tarazylar bolýǵa tıis.
Baǵany negizsiz kótergeni úshin jeke tulǵalarǵa 3 myń som (15,5 myń teńgeden astam), al zańdy tulǵalarǵa 13 myń som (67,4 myń teńge) aıyppul salynady.
Eske sala keteıik, Qyrǵyzstanda kómir eksportyna salynǵan tyıym merzimi alty aıǵa uzartylǵan edi.
Buǵan deıin Qyrǵyzstanda AI-95 markaly benzın baǵasyn memlekettik retteý toqtatylǵany habarlanǵan bolatyn.
