Qyrǵyzstanda kólikterge arnaıy sıgnaldardy qoldaný tártibi retteldi
ASTANA. KAZINFORM — El úkimeti arnaıy kólikterge jaryq jáne dybystyq sıgnaldardy ornatý men paıdalaný tártibin bekitti, dep habarlaıdy Kazinform agenttiginiń Bishkektegi menshikti tilshisi.
Jańa erejeler Keden odaǵynyń «Dóńgelekti kólik quraldarynyń qaýipsizdigi týraly» tehnıkalyq reglamentiniń talaptaryna sáıkes qabyldandy.
Kólik quraldaryna arnaıy jaryq jáne dybystyq sıgnaldardy ornatý týraly sheshimdi jol qozǵalysy qaýipsizdigin qamtamasyz etý salasyndaǵy ýákiletti memlekettik organ qabyldaıdy.
Sonymen qatar, olardyń bar ekendigi týraly belgi tehnıkalyq pasportqa engiziledi.
Qujatqa sáıkes, mınıstrlikterdiń, vedomstvolardyń jáne uıymdardyń qyzmettik kólikterinde mynadaı jaryq sıgnaldary qoldanylady:
* qyzyl-kók (qajet bolǵan jaǵdaıda aq túspen birge) dybystyq sıgnalmen: tek ishki ister organdaryna, memlekettik kúzet organyna, áskerı avtomobıl ınspektsııasyna arnalǵan.
Qozǵalysta basymdyq beredi;
* kók tústi dybystyq sıgnalmen: Tótenshe jaǵdaılar qyzmeti, jedel medıtsınalyq járdem, ınkassatsııa qyzmeti jáne baǵaly júkterdi tasymaldaý, Jazalardy oryndaý memlekettik qyzmeti jáne onyń kúzet pen aıdaýyl departamenti, kólik salasyndaǵy ýákiletti organ;
* sary nemese qyzǵylt sary dybystyq sıgnalsyz: kommýnaldyq-tehnıkalyq, qurylys, jer qazý, jol qyzmetteri, aýyl sharýashylyǵy tehnıkasy men ózdiginen júretin dóńgelekti mashınalar, qaýipti jáne iri gabarıtti júkterdi tasymaldaý úshin. Qozǵalysta basymdyq bermeıdi, tek qaýip týraly eskertedi;
* jasyl tústi dybystyq sıgnalsyz: qorshaǵan ortany qorǵaý salasyndaǵy ýákiletti memlekettik organǵa arnalǵan.
Arnaıy sıgnaldardy zańsyz ornatý nemese paıdalaný úshin Qyrǵyz Respýblıkasynyń Quqyq buzýshylyq týraly kodeksine sáıkes jaýapkershilik qarastyrylǵan.
Buǵan deıin Qyrǵyzstanda mas kúıde kólik júrgizgeni úshin jaza kúsheıtilgeni habarlanǵan bolatyn.
