Qyrǵyzstanda kólik salyǵy joq, jer salyǵynyń moratorııi 2030 jylǵa deıin uzardy
ASTANA. KAZINFORM – Qyrǵyz Respýblıkasynyń prezıdenti Sadyr Japarov salyq júıesin reformalaýǵa baǵyttalǵan Jarlyqqa qol qoıǵanyn málim etti.
- Qurmetti qyrǵyzstandyqtar! Men salyqqa baılanysty Jarlyqqa qol qoıdym. Qarapaıym azamattarǵa uǵynyqty bolý úshin onyń mazmunyn túsindirip bereıin. Men avtokólikke salynatyn salyqty tolyqtaı alyp tastaý týraly tapsyrma berdim jáne tıisti Jarlyqqa qol qoıdym.
Bul sheshim «Jol qory týraly» zańnyń kúshine enýimen baılanysty. Atalmysh qujat janarmaıdyń ár lıtrinen 1 som alym alýdy kózdeıdi. Kólik quraldarynan salyq alynbaıdy.
Onyń ornyna 1 qańtardan bastap kólikke quıylǵan benzın men dızeldiń ár lıtrinen 1 som alynady, - dep jazdy Qyrǵyz basshysy Facebook-tegi paraqshasynda.
Sondaı-aq ol 2025 jyldyń 1 qańtaryna deıin avtokólik salyǵyn tólep úlgermegenderge raqymshylyq jasalatynyn málim etti.
- Ondaı salyq tóleýshiler aıtarlyqtaı kóp bolyp shyqty. Memleketke aýyrtpalyq týdyratynyna qaramastan, osyndaı sheshim qabyldadyq.
Sondaı-aq biz zańdy tulǵalar men jeke kásipkerlerdiń 2022 jyldyń 1 qańtaryna deıin jınalyp qalǵan salyq qaryzyn keshirdik. (2022 jyldyń 1 qańtaryna deıinge kezeńdegi salyq tólemderi tekserilmeıdi), - dep jazady Sadyr Japarov.
El prezıdenti fermerlerdi jer salyǵynan bosatý týraly moratorıdi 2030 jylǵa deıin uzartqanyn málim etti.
- 2030 jylǵa deıin jer sýarý máselesin sheshemiz. Negizgi jáne qosalqy sýarý arnalaryn salyp, qolda baryn arshyp, tazartamyz. Jalpy fermerlerdiń sý máselesin sheshemiz. Osydan keıin baryp qaıtadan salyp jınaýdy bastaımyz. Biraq memleketti salyqtyń arqasynda ustap, nyǵaıtýǵa bolatynyn esterińizge salamyn, - dep jazady kórshi eldiń prezıdenti.
Aıta keteıik, Qyrǵyzstanda jemqorlyqqa qarsy jaza kúsheıtildi.