Qyrǵyzstanda qoqys tastaǵany jáne órtegeni úshin jaýapkershilik kúsheıtiledi
ASTANA. KAZINFORM — 16 qyrkúıekte Jogorký Kenesh otyrysynda «Qyrǵyz Respýblıkasynyń Quqyq buzýshylyqtar týraly kodeksine ózgerister engizý týraly» zań jobasy úshinshi oqylymda qabyldandy. Bul týraly Jogorký Keneshtiń baspasóz qyzmeti habarlady, dep jazady Kabar.
Zań jobasynyń bastamashysy — depýtat Dastan Bekeshev.
Qujat eldi mekenderdi abattandyrý erejelerin buzǵany, qoqysty belgilenbegen jerge tastaǵany, jınaǵany nemese órtegeni, sondaı-aq sý sharýashylyǵy nysandaryna zııan keltirgeni úshin jaýapkershilikti kúsheıtýge baǵyttalǵan. Sonymen qatar quqyq buzýshylarǵa aıyppuldyń ornyna qoǵamdyq jumystarǵa tartý múmkindigin engizý usynylady.
Budan bólek, depýtattar Premer-mınıstrler kabınetiniń tóraǵasy bastamashy bolǵan «Qyrǵyz Respýblıkasynyń Quqyq buzýshylyqtar týraly kodeksine ózgerister engizý týraly» zań jobasyn úshinshi oqylymda qabyldady.
Zań jobasy Quqyq buzýshylyqtar týraly kodeksti Qyrǵyz Respýblıkasynyń Tsıfrlyq kodeksine sáıkestendirý maqsatynda ázirlengen. Usynylǵan ózgerister termınologııany jańartýdy, qaıtalanatyn normalardy alyp tastaýdy jáne kodekstiń jekelegen erejelerin Tsıfrlyq kodekstiń derbes derekterdi óńdeý jáne qorǵaýdy retteıtin 11-taraýyna sáıkestendirýdi kózdeıdi.
Sonymen qatar otyrysta ekinshi oqylymda «Azamattyq hal aktileri týraly» zańǵa ózgerister engizý týraly zań jobasy qaralyp, qabyldandy.
Zań jobasy quqyqtyq olqylyqtardy joıýǵa, azamattarǵa óz múlkin erkin basqarý múmkindigin berýge, sondaı-aq ósıet boıynsha mura qaldyrýǵa qatysty konstıtýtsııalyq quqyqty iske asyrýǵa baǵyttalǵan. Usynylyp otyrǵan norma boıynsha múlikti jaqyn týysy bolyp sanalmaıtyn adamdarǵa da ósıet etýge múmkindik beriledi.
Zań jobasynyń bastamashylary — depýtattar Temırlan Aıtıev, Aısarakan Abdıbaeva, Bekmýrza Ergeshov, Janybek Amatov, Ýmbetaly Kydyralıev, Mahabat Mavlıanova, Toktobúbú Ashymbaeva, Baktyıar Kalpaev, Djaıloobaı Nyshanov, Gýlnara Akımbaeva, Azamjan Djalılov, Karım Handjeza, Bekmyrza Cholponbaı ýýlý jáne Erkeaıym Seıtkazıeva.
Budan bólek, zań jobasy «Azamattyq hal aktileri týraly» zańnyń 9-babyn tolyqtyryp, notarıýs kýálandyrǵan ósıetti usynǵan adamdarǵa qaıtys bolǵany týraly kýáliktiń kóshirmesin alý quqyǵyn berýdi kózdeıdi.
Osyǵan deıin Qyrǵyzstan qurylys materıaldarynyń birqatar túrine ýaqytsha tyıym engizgenin jazǵanbyz.
