Qyrǵyzstanda qoǵamdyq oryndardaǵy ádepsiz qylyqtar úshin jaza kúsheıtilmek
ASTANA. KAZINFORM — Qyrǵyzstanda qoǵamdyq oryndardaǵy ádepsiz áreketter úshin aıyppul men bas bostandyǵynan aıyrý jazasyn engizý usynyldy, dep habarlaıdy Kazinform agenttiginiń Bishkektegi menshikti tilshisi.
Tıisti zań jobasy qoǵamdyq talqylaýǵa shyǵaryldy.
Bastama el zańnamasyndaǵy olqylyqtardy joıýǵa baǵyttalǵan. Sebebi qazirgi tańda Qyrǵyzstanda qoǵamdyq oryndarda ózge adamnyń kelisiminsiz jasalatyn seksýaldyq sıpattaǵy áreketter úshin naqty jaza tetigi qarastyrylmaǵan. Olarǵa qajetsiz janasý, ádepsiz fızıkalyq baılanys, jynys múshelerin kórsetý, ańdý (stalkıng) nemese adamnyń ar-namysyna nuqsan keltirip, ony qorqytýǵa, kemsitýge ne qorlaýǵa baǵyttalǵan ózge de áreketter jatady.
Qujatqa sáıkes, mundaı quqyq buzýshylyqty alǵash ret jasaǵan jeke tulǵalarǵa 20 myń som (107 myń teńgeden astam) kóleminde aıyppul salý nemese 3 táýlikten 7 táýlikke deıin qamaýǵa alý jazasy qarastyrylǵan.
Al bir jyl ishinde seksýaldyq sıpattaǵy áreketterdi qaıta jasaǵandar 2 jyldan 4 jylǵa deıin bas bostandyǵynan aıyrylýy múmkin.
Sondaı-aq usynylyp otyrǵan normalar 16 jasqa tolmaǵan balalarǵa qatysty qylmystarǵa qoldanylmaıtyny atap ótildi. Mundaı áreketter úshin jaýapkershilik Qyrǵyz Respýblıkasynyń Qylmystyq kodeksindegi qoldanystaǵy baptarmen retteledi.
Buǵan deıin elde stalkıng úshin qylmystyq jaýapkershilik engizý usynylǵany habarlanǵan bolatyn.
Sonymen qatar Qyrǵyzstanda nekege turmas buryn mindetti tekserýden ótýdi engizý usynylǵanyn jazǵan bolatynbyz.
