Qyrǵyzstanda qyzylshamen aýyrǵandar sany artyp jatyr
ASTANA. KAZINFORM — Qyrǵyzstanda qyzylshamen aýyrǵandar sany áli artyp jatyr. Eki aptadaǵy ósim 1319 jaǵdaıdy qurady.
Qyrǵyzstan Densaýlyq saqtaý mınıstrliginiń Respýblıkalyq ımmýnoprofılaktıka ortalyǵynyń málimetinshe, 2024 jyldyń 8 sáýirindegi jaǵdaı boıynsha elde qyzylshamen aýyrǵan 7864 adam tirkelgen.
Juqtyrǵandardyń jalpy sanyn aýmaq boıynsha bólsek, Bishkekte – 2599, Osh qalasynda – 464, Osh oblysynda – 1226, Batkende – 214, Shý oblysynda – 1836, Jalal-Abad oblysynda – 1196, Ystyqkól oblysynda – 130, Talas oblysynda – 105 jáne Naryn oblysynda – 94.
Bishkek, Shý jáne Jalal-Abad oblystarynda vırýs áli de qarqyndy tarap jatyr.
Aýrý kóbeıýiniń negizgi sebebi - balalar men eresekter arasynda qyzylsha men qyzamyqqa qarsy josparly ımmýndaýdan bas tartýdyń kóptigi.
Qyrǵyz Respýblıkasynyń Densaýlyq saqtaý mınıstrligi qyzylshamen kúresý úshin profılaktıkalyq jáne epıdemıologııalyq sharalardy kúsheıtti. Dárigerler ata-analardy balalaryna ekpe salyp, sol arqyly balasyn jáne aınalasyndaǵylardy qaýipti ınfektsııalardan qorǵaýǵa shaqyrady.
Buǵan deıin habarlaǵanymyzdaı, qyzylsha indetine baılanysty Qyrǵyzstanda qyzylsha men qyzamyqqa qarsy qosymsha ımmýndaý naýqanynyń ekinshi kezeńi bastaldy.
