Qyrǵyzstanda qyzylsha órship, eki mektep onlaınǵa aýystyryldy
Jalal-Abad qalasynda qaýipti vırýsty syrqat – qyzylsha órshýine baılanysty eki mektep qashyqtan oqytýǵa kóshirildi, dep habarlady Qyrǵyz Respýblıkasynyń Bilim jáne ǵylym mınıstrligi. Kazinform agenttigi bul týraly Kabar agenttigine silteme jasap habarlaıdy.
Málimetke sáıkes, mundaı sheshimdi epıdemııaǵa jáne epızootııaǵa qarsy arnaıy komıssııa shyǵardy.
«Osylaısha, K.Zakırov atyndaǵy №2 orta mekteptiń jáne A.Ýsmanova atyndaǵy №7 mekteptiń oqýshylary qyzylsha aýrýynyń taraýyna baılanysty qashyqtan bilim alýǵa jiberildi», - delingen habarlamada.
Sondaı-aq bul sheshim arqyly Jalal-Abad qalalyq bilim bólimine № 063 nysan negizinde aýrýǵa qarsy ekpeden bas tartqan nemese birrettik ekpe alǵan oqýshylar sanyn naqtylaý, ár mektep jáne balabaqshada dárigerdiń tekserýine jáne vaktsına egýge arnalǵan jeke bólmelerdi jabdyqtaý tapsyrylǵan.
