Qyrǵyzstanda qysqametrajdy fılmderdiń 12-shi halyqaralyq kınofestıvali bastaldy
BІShKEK.KAZINFORM — Seısenbi kúni Qyrǵyzstan astanasy Bishkekte TMD, Baltyq jaǵalaýy jáne Grýzııa elderiniń qysqametrajdy fılmderiniń 12-shi halyqaralyq kınofestıvali bastaldy. Bul týraly Qyrǵyzstan Mádenıet mınıstrligi janyndaǵy Kınematografııa departamenti habarlady, dep jazady Sınhýa agenttigi.
Kınofestıvaldiń saltanatty ashylýy «Manas» kınoteatrynda ótti, onda 26 sáýirge deıin festıvalge qatysý úshin iriktelip alynǵan qysqametrajdy fılmderdiń kórsetilimi bolady.
Kınofestıvalge sheteldik jáne otandyq kınematografısterden 800-den astam ótinim túsken.
«Festıval az jyldardyń ishinde kınematografısterdiń basyn qosyp, jumystaryn kórsetetin, ıdeıalary men tájirıbesimen bólisetin, jańa jobalarǵa seriktester tabatyn alańǵa aınaldy. Kórshi elderdiń kınosúıer qaýymy, óz kezeginde, qoǵamdy adamgershilik, estetıkalyq bastaýlar men rýhanı murattarǵa baǵyttaý úshin qysqametrajdy fılmder jasaýdyń shekarasyn keńeıtýge umtylady», - delingen habarlamada.
TMD, Baltyq jáne Grýzııa elderiniń qysqametrajdy fılmderiniń halyqaralyq kınofestıvali 2010 jyly qurylǵan.
