Qyrǵyzstanda «Qyrǵyzındýstrııanyń» burynǵy basshysy qamaýǵa alyndy

BІShKEK. KAZINFORM – «Qyrǵyzındýstrııa» basshylyǵy bıýdjet qarajatyn ıelený men jymqyrýdyń turaqty shemasyn qurdy, dep habarlaıdy Kazinform tilshisi.

Qyrǵyzstan Respýblıkasy UQMK-niń habarlaýynsha, 24 qańtarda QR Bas prokýratýrasy júrgizgen keshendi tekserý negizinde «Qyrǵyzónerkásip» AAQ jaýapty qyzmetkerlerine qatysty sybaılas jemqorlyq faktisi boıynsha qylmystyq is qozǵaldy.

- 2022-2024 jyldary «Qyrǵyzındýstrııaǵa» respýblıkalyq bıýdjetten 2,3 mlrd-tan astam som bólindi. Aktsıonerlik qoǵamnyń jekelegen laýazymdy tulǵalary jeke paıdakúnemdik maqsattaryn kózdep, enshiles uıymdar arqyly bıýdjet qarajatyn ıelený men jymqyrýdyń turaqty sybaılas jemqorlyq shemasyn jasaǵan. Atalǵan merzim ishinde kompanııa 40-tan astam zalaldy kásiporyndy qarjylandyrdy, - delingen habarlamada.

Tergeý nusqasy boıynsha, «Qyrǵyzındýstrııa» basshylyǵy bastapqyda ózderi jáne jaqyn tulǵalary úshin zańsyz baıý jáne qolaıly jaǵdaı jasaý maqsatyn kózdegen.

- Kompanııa qurylymynda joǵary jalaqy taǵaıyndalǵan týystar, dostar jáne jaqyn adamdar kóp bolǵan. 75 qyzmetkerdiń 33-i basshylyq qyzmette boldy. Bul rette «Qyrǵyzındýstrııa» basshylyǵy men keıbir qyzmetkerleri bir mezgilde enshiles uıymdarda qyzmet atqaryp, olardan da jalaqy alatyn, - dep atap ótti UQMK.

Tıimsiz basqarý, memlekettik resýrstardy utymsyz paıdalanýdyń jáne olardy qasaqana ysyrap etý saldarynan memleketke erekshe úlken shyǵyn keltirildi, onyń naqty kólemi anyqtalyp jatyr.

«Qyrǵyzındýstrııa» AQ burynǵy prezıdenti A.J. jáne vıtse-prezıdenti V.V. ustalyp, Qyrǵyz Respýblıkasy UQMK ýaqytsha ustaý abaqtysyna qamaldy, olarǵa belgilengen merzimde aıyp taǵylatyn bolady.

Buǵan deıin Interpoldyń izdeýinde júrgen Qyrǵyzstan prezıdentiniń burynǵy kómekshisi Moldovada ustalǵanyn jazǵan bolatynbyz.