Qyrǵyzstan qurylys materıaldarynyń birqatar túrine ýaqytsha tyıym engizdi
ASTANA. KAZINFORM — Qyrǵyzstan Mınıstrler kabıneti el aýmaǵyna qurylys materıaldarynyń jekelegen túrlerin ákelýge ýaqytsha tyıym saldy, dep habarlaıdy Kabar.
Tıisti sheshimge Qyrǵyzstan Mınıstrler kabınetiniń tóraǵasy Adylbek Qasymalıev qol qoıdy. Ýaqytsha tyıym alty aı merzimge engizildi.
Qaýlynyń maqsaty — otandyq qurylys materıaldaryn óndirýshilerdi qorǵaý, ishki naryqty turaqtandyrý, sondaı-aq úshinshi elder tarapynan bolatyn ımporttyq básekelestik jaǵdaıynda Qyrǵyzstannyń ekonomıkalyq jáne ulttyq qaýipsizdigin qamtamasyz etý.
Qyrǵyzstanǵa ákelýge ýaqytsha tyıym salynǵan qurylys materıaldary:
- Qurylys bloktary men kirpishter – jeńil betonnan, tsementten, betonnan nemese jasandy tastan jasalǵan bloktar men kirpishter;
- Trotýar jáne qaptaý plıtkalary – edenge, peshke, kamınge, qabyrǵaǵa arnalǵan plıtkalar;
- Keramıkalyq plıtkalar – ártúrli pishindegi plıtka, tekshe jáne soǵan uqsas buıymdar;
- Shynynyń keı túrleri – quıylǵan, prokattalǵan, tartylǵan jáne úrlengen shyny, sondaı-aq termııalyq óńdelgen, tegistelgen nemese jyltyratylǵan shyny;
- Elektr kabelderi – alıýmınıı jáne mys talshyqtary bar kabelder. Onyń ishinde AVVG, AVVGng, AVVGng-LS, VVG, VVGng, VVGng-LS markalary, qımasy 1,5-ten 240 mm²-ge deıingi jáne 1-den 5 talshyqqa deıingi kabelder;
- Ózin-ózi ustap turatyn oqshaýlanǵan symdar – SIP-1, SIP-2, SIP-3, SIP-4 jáne SIP-5 markalary, qımasy 16-dan 150 mm²-ge deıin.
Qyrǵyzstan aýmaǵyna ákelýge ýaqytsha tyıym salynǵan qurylys materıaldarynyń jekelegen túrleriniń tizimimen jáne qaýlynyń tolyq mátinimen Qyrǵyzstan Mınıstrler kabınetiniń resmı saıtynan tanysýǵa bolady.
Osydan buryn Qyrǵyzstannyń qazirgi memlekettik qaryzy qansha ekenin jazǵan bolatynbyz.
