Qyrǵyzstanda Qazaqstannan kontrabandalyq benzın tasymaldaǵan 37 kólik toqtatyldy
ASTANA. KAZINFORM — Jaqynda Qyrǵyzstanda arnaıy reıd barysynda Qazaqstannan Qyrǵyzstanǵa zańsyz janar-jaǵarmaı tasymaldaǵan 37 kólik toqtatylyp, olardyń júrgizýshileri ustaldy, dep habarlaıdy Kazinform agenttiginiń Bishkektegi tilshisi Qyrǵyzstan ІІM Jol-patrýldik polıtsııa basqarmasyna silteme jasap.
Basqarmanyń málimetinshe, qosymsha janarmaı bagymen jabdyqtalǵan jeńil jáne júk kólikteri Qazaqstannan kontrabandalyq benzın tasymaldap, ony jol boıynda satyp kelgen.
— Qazirgi ýaqytta kólikterdiń barlyǵy Tokmok qalasyndaǵy arnaıy aıyp turaǵyna qoıyldy, al júrgizýshilerge 5500 som (shamamen 31 myń teńge) kóleminde aıyppul salyndy, — delingen habarlamada.
Eske salsaq, ótken jyly da qazaqstandyq benzınniń Qyrǵyzstanǵa zańsyz shyǵarylýy týraly habarlanǵan bolatyn. 2023 jylǵy naýryzda Chúı oblysynda 36 júrgizýshi zańsyz janarmaı tasymaldaǵany úshin toqtatylǵany málim bolǵan.
Budan buryn Qyrǵyzstanda mıneraldy tyńaıtqyshtardy eksporttaýǵa ýaqytsha shekteý engizilgeni aıtyldy.