Qyrǵyzstanda qazaqstandyq tehnıkalyq JOO fılıaldary ashylady
ASTANA. KAZINFORM – Qyrǵyzstanda qazaqstandyq tehnıkalyq joǵary oqý oryndarynyń fılıaldaryn ashý josparlanýda. Bul týraly QR Syrtqy ister mınıstri Murat Nurtileý Bishkekte ótken baspasóz máslıhatynda málimdedi.
Qyrǵyz áriptesimen kelissózder qorytyndysy boıynsha Syrtqy ister mınıstri Murat Nurtileý mádenı-gýmanıtarlyq saladaǵy yntymaqtastyqty keńeıtý týraly aıtyp berdi.
«Biz bilim berý salasynda ózara is-qımyldy belsendi túrde arttyryp jatyrmyz. Ál-Farabı atyndaǵy Qazaq ulttyq ýnıversıteti men L.N. Gýmılev atyndaǵy Eýrazııa ulttyq ýnıversıteti Bishkek pen Osh qalalarynda óz fılıaldaryn ashty. Meniń oıymsha, bul tájirıbe odan ári jalǵasady. Búgin biz Qyrǵyzstanda tehnıkalyq joǵary oqý oryndaryn ashý máselesin talqyladyq. Atyraý munaı jáne gaz ınstıtýty óz fılıalyn ashýdy josparlap otyr. Sondaı-aq, «KAZ Minerals Bozymchak» óndiristik kásiporny janynda kásiptik-tehnıkalyq ýchılışe ashylady», - dedi Murat Nurtleý.
Mınıstr qyrǵyz tarapynan suranys bolǵan jaǵdaıda Qazaqstan Qyrǵyzstan stýdentteri úshin QR joǵary oqý oryndaryna granttar men kvotalardy ulǵaıtýǵa daıyn ekenin jetkizdi.
Eske sala ketsek, Murat Nurtileý resmı saparmen Bishkekke keldi.
Ol Qyrǵyz Respýblıkasy Syrtqy ister mınıstrliginiń basshysy Jeenbek Kýlýbaevpen kelissózder júrgizdi. Onyń barysynda Qyrǵyzstan prezıdenti Sadyr Japarovtyń Qazaqstanǵa resmı saparmen keletini belgili boldy.
