Qasym-Jomart Toqaevtyń «Áke týraly oı-tolǵaý» atty kitaby qyrǵyz tiline aýdaryldy
ASTANA. KAZINFORM — Osh qalasynda Qazaqstan Respýblıkasy Prezıdenti Qasym-Jomart Toqaevtyń «Áke týraly oı-tolǵaý» («Atam jónúndó baıan») atty qyrǵyz tiline aýdarylǵan kitabynyń tanystyrylymy ótti. Bul týraly Mádenıet jáne aqparat mınıstrligi habarlady.
Kitap qazaq ádebıetindegi detektıv janrynyń negizin qalaǵan, eldik pen erlik jolynda qalam terbegen kórnekti jazýshy, qaıratker tulǵa Kemel Toqaevqa arnalǵan.
Іs-shara Qyrǵyz Respýblıkasynyń Syrtqy ister mınıstrliginiń konferentsııa zalynda ótti. Oǵan QR Mádenıet jáne aqparat mınıstri Aıda Balaeva, Qyrǵyzstannyń Mádenıet, aqparat, sport jáne jastar saıasaty mınıstriniń orynbasary Askaraly Madamınov, Osh qalasynyń mery Jenıshbek Toktorbaev, OshMÝ rektory Qýdaıberdı Kojobekov, Qyrǵyzstan Jazýshylar odaǵynyń burynǵy tóraǵasy Nýrlanbek Kalybekov jáne Qyrǵyzstannyń shyǵarmashylyq zııaly qaýym ókilderi qatysty.
Mádenıet jáne aqparat mınıstri Aıda Balaeva eki el Prezıdentteriniń dostyq pen senimge negizdelgen tyǵyz qarym-qatynasy saıası jáne ekonomıkalyq salalarmen qatar, mádenı-gýmanıtarlyq baılanystarǵa da tyń serpin berip keletinin atap ótti.
— Búgin Qazaqstan Respýblıkasynyń Prezıdenti Qasym-Jomart Kemeluly Toqaevtyń «Áke týraly oı-tolǵaý» atty tereń maǵynaly eńbeginiń qyrǵyz tilindegi tanystyrylymy — eki el arasyndaǵy ádebı baılanystardy jańa beleske kóteretin máni zor qadam. Týyndynyń qazaq tilinen qyrǵyz tiline aýdarylýy — bizdiń ortaq tarıhı-mádenı keńistigimizdiń tabıǵı jalǵasy jáne rýhanı sabaqtastyǵymyzdyń kórinisi. Bul kitaptyń oqyrmanǵa qýat, tárbıe, oı jáne júrek jylýyn syılaıtynyna senim bildiremin, — dedi mınıstr.
Bul kitap ǵumyry jıyrmasynshy ǵasyrdyń barlyq aýyrtpalyǵyn arqalaǵan barsha qazaqtyń taǵdyrymen astasyp jat halqymyzdyń kórnekti jazýshysy Kemel Toqaev jaıynda. Maıdan jyldarynyń qasireti, soǵystan keıingi jańarý kezeńi, adamdyq pen adaldyq týraly túsinik — osynyń bári kitapta shynaıy beınelenedi.
— Bul kitap qyrǵyz jáne qazaq halyqtarynyń dostyǵyn nyǵaıtýda zor mańyzǵa ıe. Qazaq tilinen qyrǵyz tiline aýdarylyp, qyrǵyz oqyrmandaryna usynylýy — eki el arasyndaǵy rýhanı baılanystyń belgisi. Bul — halyqtarymyzdyń mádenı birligi men baýyrlastyǵynyń aıqyn dáleli, — dedi Askaraly Madamınov.
Tusaýkeserge jınalǵan kópshilikke Prezıdent kitabynyń jelisi boıynsha túsirilgen «Baýyr» atty derekti fılm kórsetildi. Aıta keteıik, «Áke týraly oı-tolǵaý» kitaby rýmyn, arab, mońǵol, túrik jáne qyrǵyz tilderine aýdaryldy.
Aıta ketelik Mustafa Shoqaı jaıly kitap ózbek tilinde jaryq kórgen edi.