Qyrǵyzstanda Qazaqstan medıtsınasy kúnderi bastaldy
ASTANA. KAZINFORM - 15-18 qyrkúıek aralyǵynda Qyrǵyz Respýblıkasynda Qazaqstan medıtsınasy kúnderi ótedi, dep habarlaıdy QR Densaýlyq saqtaý mınıstrliginiń basspasóz qyzmeti.
Іs-shara sheńberinde praktıkalyq densaýlyq saqtaý salasyndaǵy, onyń ishinde kardıologııa, onkologııa, akýsherııa jáne gınekologııa, pedıatrııa men travmatologııa baǵyttarynda, sondaı-aq ǵylymı ázirlemeler boıynsha tájirıbe almasý josparlanǵan.
-Qazaqstan medıtsınasy kúnderi – dárigerlerdiń naqty jumysy arqyly elimizdiń densaýlyq saqtaý júıesiniń áleýetin tanystyrýǵa múmkindik beretin mańyzdy alań. Mundaı ózara is-qımyl kásibı baılanystardy nyǵaıtyp, Qazaqstan men Qyrǵyzstan arasyndaǵy densaýlyq saqtaý salasyndaǵy dástúrli ári tyǵyz yntymaqtastyqty odan ári damytýǵa yqpal etedi, – dep atap ótti Qazaqstan Respýblıkasynyń Densaýlyq saqtaý vıtse-mınıstri, delegatsııa basshysy Manas Ramazanov.
Alǵashqy kúnnen bastap qazaqstandyq dárigerler shalǵaı eldi mekenderdiń turǵyndaryna konsýltatsııalar júrgizip, medıtsınalyq tekserýlerden ótkizip jatyr.
Іs-sharanyń birinshi kúninde 16 qazaqstandyq maman Vasılevka jáne Hýn-Chı aýyldarynyń turǵyndaryn qabyldaı bastady. Turǵyndardy tekserý úshin Almaty oblysy Qyrǵyzstanǵa zamanaýı dıagnostıkalyq qural-jabdyqtarmen jaraqtandyrylǵan úsh jyljymaly medıtsınalyq keshen jiberdi.
-Qyrǵyzstanda Qazaqstan medıtsınasy kúnderiniń ótkizilýi densaýlyq saqtaý salasyndaǵy dostas memleketterdiń arasyndaǵy strategııalyq áriptestikti nyǵaıtý jolyndaǵy taǵy bir mańyzdy qadam boldy,-delingen habarlamada.
Osyǵan deıin 50-den astam aqparattyq júıemen biriktirilgen medıtsınalyq derekter qoımasy quryldy.
