Qyrǵyzstanda qaıyr suraǵan sheteldikter elden shyǵarylady

ASTANA. KAZINFORM - Qyrǵyzstanda joldar men qoǵamdyq oryndardaǵy qaıyr suraýshylyqpen kúresýge, sondaı-aq osal toptardy osyndaı áreketterge tartýdan qorǵaýǵa baǵyttalǵan zańǵa qol qoıyldy, dep habarlaıdy Kazinform agenttiginiń Bishkektegi menshikti tilshisi.

Quqyqbuzýshylyqtar týraly kodeks pen syrtqy kóshi-qon týraly zańǵa engizilgen ózgeristerge sáıkes, shetel azamattaryna qaıyr suraǵany úshin jaýapkershilik qarastyrylǵan. Qaıtalanǵan quqyqbuzýshylyq nemese bir aı ishinde osyndaı áreketke tartý deregi anyqtalǵan jaǵdaıda, olar Qyrǵyzstan aýmaǵynan shyǵarylady.

Joldyń júris bóliginde qaıyr suraý, sondaı-aq qoǵamdyq oryndarda aqsha nemese ózge de materıaldyq qundylyqtardy alý maqsatynda adamdarǵa tıisý úshin 20-dan 30 saǵatqa deıin qoǵamdyq jumystarǵa tartý nemese úsh táýlikke deıin qamaýǵa alý jazasy kózdelgen. Bir aı ishinde qaıtalansa, 30-dan 40 saǵatqa deıin qoǵamdyq jumystar nemese úshten bes táýlikke deıin qamaý qarastyrylǵan.

Qaıyr suraýǵa qarttardy, júkti áıelderdi, múgedektigi bar adamdardy nemese psıhıkalyq aýytqýy bar tulǵalardy tartqany úshin aıyppul mólsheri kúsheıtilgen — 20 myń som (shamamen 105 myń teńge).

Іshki ister organdary ustalǵan jergilikti azamattar týraly málimetterdi, eger olar qıyn ómirlik jaǵdaıǵa tap bolsa, áleýmettik qorǵaý organdaryna joldaýy tıis.

Buǵan deıin 2026 jyldyń naýryz aıynda Qyrǵyzstan parlamentinde qaıyr suraýshylyq deńgeıin tómendetýge baǵyttalǵan zań jobasy qaralǵany habarlanǵan bolatyn.

Osyǵan deıin Qyrǵyzstanda ruqsat etilmegen oryndarǵa qoqys tastaǵandar qoǵamdyq jumysqa tartylatyny týraly jazdyq.