Qyrǵyzstanda qarjy pıramıdasyn qurǵandarǵa 12 jylǵa deıin jaza qoldaný usynyldy
ASTANA. KAZINFORM — Qyrǵyzstanda qarjy pıramıdasyn jáne alaıaqtyq ınvestıtsııalyq shemalardy uıymdastyrǵany, basqarǵany jáne jarnamalaǵany úshin jazany qatańdatý josparlanyp otyr, dep habarlaıdy Kazinform agenttiginiń Bishkektegi menshikti tilshisi.
Tıisti zańnamalyq túzetýler qoǵamdyq talqylaýǵa shyǵaryldy.
Qujatta mynadaı jaza túrleri qarastyrylǵan:
* Qarjy pıramıdasyn nemese alaıaqtyq ınvestıtsııalyq shemany qurǵany jáne basqarǵany, sondaı-aq aqsha tartýǵa baǵyttalǵan oqytý semınarlaryn, vebınarlardy, kýrstar men marafondardy lıtsenzııasyz uıymdastyrǵany úshin 5 jyldan 7 jylǵa deıin bas bostandyǵynan aıyrý jazasy kózdelgen.
* Qarjy pıramıdasyn nemese alaıaqtyq ınvestıtsııalyq shemany BAQ, áleýmettik jeliler, messendjerler jáne jeke akkaýnttar arqyly kópshilikke jarnamalap, iri kólemde zalal keltirgenderge 300 myńnan 500 myń somǵa deıin (1,5–2,5 mln teńge) aıyppul salý nemese 3 jyldan 5 jylǵa deıin bas bostandyǵynan aıyrý jazasy usynylady. Sonymen qatar eki jylǵa deıin belgili bir qyzmetpen aınalysýǵa tyıym salý kózdelgen.
* Aldyn ala sóz baılasqan adamdar toby ınternet-tehnologııalardy paıdalanyp, asa iri kólemde zalal keltirgen jaǵdaıda, múlki tárkilenip, 7 jyldan 10 jylǵa deıin bas bostandyǵynan aıyrý jazasy qarastyrylǵan. Sondaı-aq úsh jylǵa deıin belgili bir laýazymdardy atqarýǵa tyıym salynady.
* Quqyqbuzýshylyqty uıymdasqan top nemese qylmystyq qaýymdastyq quramynda jasaǵandarǵa múlkin tárkileý jáne úsh jylǵa deıin belgili bir laýazymdardy atqarý quqyǵynan aıyrý jazasy qarastyrylǵan. Bas bostandyǵynan aıyrý merzimi 10 jyldan 12 jylǵa deıin.
Sondaı-aq qylmys zaty retinde aqsha qarajaty men ózge de múlikpen qatar vırtýaldy aktıvter de qarastyrylady.
Zańnamalyq túzetýlerge sáıkes, Ulttyq bank pen Qarjy naryǵyn retteý jáne qadaǵalaý qyzmetine kúmándi qarjylyq operatsııalardy toqtata turýǵa jáne quqyqbuzýshylardyń ınternet-resýrstaryn sot sheshiminsiz 48 saǵatqa deıin buǵattaýǵa ókilettik berý kózdelgen.
Qyrǵyzstan Bas prokýratýrasynyń dereginshe, 2026 jyldyń toǵyz aıynda ınternet-alaıaqtyqtan kelgen jalpy shyǵyn 337,5 mln somnan asqan. Tergeý barysynda jábirlenýshilerge osy somanyń tek 8,9 mln somy nemese 2,6 paıyzy ǵana qaıtarylǵan.
Buǵan deıin Qyrǵyzstanda jeke derekterdi qorǵaý talaptaryn buzǵany úshin aıyppul engizilgeni habarlanǵan bolatyn.