Qyrǵyzstanda qaraquıryq popýlıatsııasy qalpyna keltirilip jatyr

ASTANA. KAZINFORM — Ystyqkól óńirinde «Arǵalı», «Іlbis Qory» qoǵamdyq qorlary jáne «Gúlistan» sharýashylyǵy «Jeıren-Ordo» jobasyn iske asyrýdy bastady, dep habarlaıdy Kazinform tilshisi.

Bul joba qaraquıryq popýlıatsııasyn qalpyna keltirýge baǵyttalǵan.

Olardyń málimetinshe, brakonerlik jáne tabıǵı aýmaqtardyń ózgerýi saldarynan qaraquıryqtar joıylý qaýpinde tur. Olardyń sany men taralý aımaǵy óte tómen deńgeıge deıin azaıyp ketken. Qazir adamnyń kómeginsiz popýlıatsııany tabıǵı jolmen qalpyna keltirý múmkin bolmaı otyr.

Ystyqkóldiń ońtústik jaǵalaýy — tabıǵı jaǵdaılary qolaıly aýmaq. Degenmen munda qaraquıryqtardyń qarasy kórinbegenine kóp ýaqyt boldy. Popýlıatsııany qalpyna keltirýdiń jalǵyz joly — reıntrodýktsııa, ıaǵnı basqa aımaqtardan janýarlardy ákelý.

«Jeıren-Ordo» jobasynda qaraquıryqtar tabıǵı ortaǵa «jumsaq ádispen» shyǵarylady. Jobanyń bastapqy kezeńinde janýarlar beıimdelý jáne kóbeıý úshin jartylaı erkin túrde qamqorlyqqa alynady, keıin olar buryn mekendegen jerlerine jiberiledi. Qazir ortalyqta 43 qaraquıryq bar, al jyl sońyna deıin olardyń sanyn 60-qa jetkizý josparda bar. Bıyl 25 qaraquıryq alǵash ret jabaıy tabıǵatqa jiberiledi: aldymen 12 erkek, sodan keıin olar beıimdelgennen keıin 13 urǵashy men olardyń tólderi.

Aldaǵy ýaqytta joba uıymdastyrýshylary jyl saıyn 15–20 qaraquıryqty jabaıy tabıǵatqa shyǵarýdy josparlap otyr. Brakonerlikti tıisti dárejede baqylaǵan jaǵdaıda joba boıynsha 10 jyl ishinde aımaqtaǵy qaraquıryqtar sany 500-ge deıin arttyrylady.

Osyǵan deıin Jetisýda ormanshylar Qyzyl kitapqa engen qaraquıryqtardy aýlaǵany úshin sottalǵanyn jazǵanbyz.