«Januıa» ortalyǵy 8 aıda 2800-den asa adamǵa zańgerlik kómek kórsetti

ASTANA. KAZINFORM — Astanadaǵy «Januıa» Otbasyn qoldaý ortalyǵy qıyn jaǵdaıǵa tap bolǵan árbir otbasyǵa jan-jaqty qoldaý kórsetip keledi, dep habarlaıdy elorda ákimdiginiń resmı saıty.

Máselen ortalyqtyń zań bólimi azamattarǵa óz máselelerin zań aıasynda durys sheshýge kómektesip, áleýmettik ádilettilik pen teńdikke qol jetkizýge múmkindik beredi.

Azamattardy quqyqtyq qamtamasyz etý jáne zańgerlik kómek kórsetý bóliminiń basshysy Erbol Esbulǵanovtyń aıtýynsha, qańtar-tamyz aılary aralyǵynda ortalyqta 2811 adamǵa zańgerlik jáne medıatsııalyq kómek kórsetilgen.

— Ortalyǵymyzǵa kópbalaly, tolyq emes otbasylar, múmkindigi shekteýli balasy bar januıalar, sondaı-aq áleýmettik jáne qarjylyq qıyndyqtarǵa tap bolǵan azamattar jıi júginedi. Sonymen qatar turmystyq zorlyq-zombylyqqa ushyraǵan, jumyssyz jáne áleýmettik az qamtylǵan otbasylar da zańdy kómek alý úshin kelip jatady. Biz olardyń ótinishterin qabyldap, quqyqtyq keńes usynamyz, qajet bolǵan jaǵdaıda protsessýaldyq qujattardy ázirleımiz jáne sotqa deıingi quqyqtyq súıemeldeý kórsetemiz, — deıdi Erbol Esbulǵanov. 

Sondaı-aq ortalyqta halyqtyń quqyqtyq saýattylyǵyn arttyrý maqsatynda aqparattyq jumystar júrgizip, memlekettik organdar, úkimettik emes uıymdar men advokattarmen yntymaqtastyq ornatady.

— «Januıa» ortalyǵynyń zańgerlik bólimi azamattarǵa tegin, qoljetimdi jáne sapaly quqyqtyq kómek kórsetýge arnalǵan. Ortalyqta quqyqtyq kómekke qatysty ashyq esik kúnderi, jıyndar jáne merekelik aktsııalar jıi uıymdastyrylyp turady. Bólim qyzmetkerleri Ádilet departamenti, jeke sot oryndaýshylary men advokattar alqasy ókilderimen birlese otyryp, ártúrli is-sharalar uıymdastyrady, — deıdi Esbulǵanov. 

Sonymen qatar «Januıa» Otbasyn qoldaý ortalyǵy psıhologııalyq keńes berý jáne qıyn jaǵdaıǵa túsken otbasylarǵa áleýmettik qoldaý kórsetý qyzmetterin usynady.

Osyǵan deıin qazaqstandyqtar tegin JI-zańger kómegine júgine alatynyn jazǵan edik.