Qyrǵyzstanda Ystyqkól men Sonkólde balyq aýlaýǵa moratorıı engizildi
ASTANA. KAZINFORM — Qyrǵyzstan Mınıstrler kabıneti prezıdenttiń «Ystyqkól men Sonkólde kásiptik maqsatta balyq aýlaýǵa moratorıı engizý týraly» jarlyǵyn iske asyrý jáne balyq sharýashylyǵy sý aıdyndaryndaǵy balyq qoryn saqtaý ári kóbeıtý maqsatynda tıisti qaýly qabyldady.
Bul týraly Mınıstrler kabıneti habarlady, dep jazady Kabar.
Qujatqa Mınıstrler kabınetiniń tóraǵasy Ádilbek Qasymalıev qol qoıǵan.
Sý resýrstary, aýyl sharýashylyǵy jáne óńdeý ónerkásibi mınıstrligi janyndaǵy Balyq sharýashylyǵy kesheni departamentine úsh jyl merzimge Ystyqkól men Sonkólde balyq aýlaýǵa arnalǵan ruqsat qujattaryn berýdi ýaqytsha toqtatý tapsyryldy.
Alaıda mynadaı jaǵdaılarda balyq aýlaýǵa ruqsat etiledi:
-
balyq qoryn jasandy jolmen kóbeıtýge arnalǵan bekitilgen jáne belgilengen tártippen kelisilgen josparly jumystar kezinde;
-
áýesqoılyq jáne sporttyq balyq aýlaý maqsatynda;
-
kásiptik maqsatta aýlanbaıtyn jergilikti balyq túrleriniń sanyn retteý úshin jyl saıyn júrgiziletin melıoratsııalyq jumystar barysynda;
-
ǵylymı-zertteý sharalary men balyq qorynyń jaǵdaıyn ıhtıologııalyq baqylaý kezinde.
Qyrǵyzstannyń Sý resýrstary, aýyl sharýashylyǵy jáne óńdeý ónerkásibi mınıstrligine birqatar mindet júkteldi.
Atap aıtqanda, moratorıı kezinde Ystyqkól men Sonkóldegi balyq qoryn molaıtý úshin Ystyqkól forelin, sıg-lýdoga jáne sazan balyqtaryn jasandy jolmen kóbeıtý jumystaryn turaqty júrgizý tapsyryldy.
Sondaı-aq Sonkólde jergilikti balyq túrleriniń shamadan tys kóbeıýin retteý maqsatynda jyl saıyn melıoratsııalyq jumystar júrgizilýi kerek.
Mınıstrlik jyl saıyn 30 jeltoqsanǵa deıin osy qaýlynyń oryndalýy týraly aqparatty Qyrǵyzstan prezıdentiniń ákimshiligine usynyp otyrýǵa mindetti.
Qaýly resmı jarııalanǵan kúnnen bastap 10 kún ótken soń kúshine enedi.
Buǵan deıin Qyrǵyzstanda qarjy pıramıdasyn qurǵandarǵa 12 jylǵa deıin jaza qoldaný usynyldy.