Qyrǵyzstanda ınternette jala jaýyp, ar-ojdandy qorlaǵany úshin joǵary aıyppul salynbaq
ASTANA. KAZINFORM – Qyrǵyzstanda buqaralyq aqparat quraldary men ınternette adamǵa jala japqany jáne ar-namysyna tıgeni úshin jazany qatańdatý usynylady. Mınıstrler kabıneti ázirlegen tıisti zań jobasy Parlamenttiń qaraýyna engizildi.
Qujatty ázirleýshiler Qyrǵyzstanda BAQ jáne áleýmettik jeliler arqyly adamdarǵa til tıgizý men kemsitýdiń kóbeıýi baıqalǵanyn atap ótti. Qazir qoldanystaǵy Qyrǵyzstannyń azamattyq zańnamasy ar-namysqa tıip qorlaǵan jaǵdaıda jetkilikti ári tıimdi jaýap bermeıdi. Buqaralyq aqparat quraldaryna jáne ınternetke taratylǵan ar-namysqa tııý men qorlaý jalpy qoǵamǵa teris áser etedi. Bul qaqtyǵystardyń kúsheıýine, tulǵaaralyq qatynastardyń nasharlaýyna jáne qoǵamdyq turaqtylyqtyń buzylýyna ákelýi múmkin.
Túzetýler engizý arqyly aıyppul túrindegi kelesi jaýapkershilik kózdeledi:
- BAQ -ta, ınternet jelisindegi saıtta nemese ınternet jelisindegi saıttyń betinde – jeke tulǵalarǵa -1000 eseptik kórsetkish (100 myń som) mólsherinde, zańdy tulǵalarǵa -2000 eseptik kórsetkish (200 myń som) mólsherinde ádepsiz nysanda kórsetilgen basqa adamnyń ar-namysy men qadir-qasıetin qasaqana qorlaǵany úshin.
- Jala japqany, ıaǵnı basqa adamnyń ar-namysy men qadir-qasıetine nuqsan keltiretin nemese onyń bedeline nuqsan keltiretin jalǵan málimetterdi taratqany úshin buqaralyq aqparat quraldarynda, ınternet jelisindegi saıtta nemese ınternet jelisindegi saıttyń betinde jeke tulǵalar úshin 1000 eseptik kórsetkish (100 myń som) mólsherinde, zańdy tulǵalarǵa aıyppul kózdelgen – 2000 eseptik kórsetkish (200 myń som).
