Qyrǵyzstanda hantavırýstyń taralý qaýpi qandaı
ASTANA.KAZINFORM - Qyrǵyzstannyń Densaýlyq saqtaý mınıstrligi hantavırýs jaǵdaıyna qatysty túsinik berdi, dep habarlaıdy Kazinform agenttiginiń Bishkektegi tilshisi.
Aýrýdyń aldyn alý jáne memlekettik sanıtarlyq-epıdemıologııalyq qadaǵalaý departamentiniń málimeti boıynsha, eldegi juqpaly aýrýlardyń epıdemıologııalyq jaǵdaıy turaqty jáne baqylaý kún saıyn kúsheıtilip jatyr.
Sarapshylardyń baǵalaýy boıynsha, hantavırýstyń Qyrǵyzstan Respýblıkasyna kelý qaýpi tómen, bul jalpy halyqqa nemese týrısterge eshqandaı qaýip tóndirmeıdi.
- Úreılenýge eshqandaı sebep joq. Kóptegen adam úshin juqtyrý qaýpi mınımaldy, al qarapaıym aldyn alý sharalaryn saqtaý juqtyrý yqtımaldyǵyn tıimdi túrde tómendetýi múmkin, - delingen málimdemede.
Densaýlyq saqtaý mınıstrligi dalada júrgende jáne kemirgishter mekendeıtin jerlermen baılanysta bolǵanda saq bolýdy usynady.
Buǵan deıin Argentınadan Kabo-Verdege sapar shekken krýızdik kemede hantavırýs juqtyrý jaǵdaıy, onyń ishinde úsh adamnyń ólimi anyqtalǵany habarlanǵan bolatyn.
Izraılde Shyǵys Eýropaǵa sapar shekken jolaýshydan hantavırýs juqtyrýdyń alǵashqy jaǵdaıy tirkeldi.
Dúnıejúzilik densaýlyq saqtaý uıymy juqtyrǵan adamdarmen baılanysta bolǵannan keıin evakýatsııalanǵan MV Hondius jolaýshylaryn 42 kún karantınge jatqyzýdy usyndy. Frantsııa men Amerıka Qurama Shtattaryna evakýatsııalanǵan Hondius-tan taǵy eki jolaýshynyń hantavırýsqa tapsyrǵan testi oń nátıje berdi.
Sondaı-aq, krýızdik kemeniń 18 jolaýshysy Amerıka Qurama Shtattaryna jetkizilip, karantınge jatqyzylǵany habarlandy.
