Qyrǵyzstanda halyqaralyq is-sharalar tendersiz ótkiziledi
ASTANA. KAZINFORM – Qyrǵyzstanda ulttyq jáne halyqaralyq is-sharalarǵa baılanysty satyp alýlar, sheteldik delegatsııalar sapary jáne basym memlekettik tapsyrmalardy oryndaý memlekettik satyp alý týraly zań talaptarynan bosatylady, dep habarlaıdy Kazinform agenttiginiń menshikti tilshisi.
Tıisti zańǵa Qyrǵyzstan prezıdenti Sadyr Japarov qol qoıdy. Sheshim tek belgili bir salalardaǵy satyp alýǵa qatysty máselelerdi jedel sheshýge baǵyttalǵan jáne respýblıkalyq jáne jergilikti bıýdjetter esebinen qarjylandyrylady.
Qujatqa sáıkes, mundaı satyp alýlar eldiń azamattyq zańnamasyna sáıkes tapsyrys berýshi men merdiger arasyndaǵy standartty azamattyq-quqyqtyq sharttar boıynsha júzege asyrylady, bul protsesti aıtarlyqtaı jedeldetýi kerek.
Sonymen qatar, túzetýler «memlekettik tapsyrma» uǵymyn engizedi, ol sondaı-aq belgili bir satyp alýlardy jeńildetilgen tártippen júzege asyrýǵa múmkindik beredi. Bul termın áleýmettik-ekonomıkalyq turaqtylyqty jáne memlekettiń áleýmettik-mádenı damýyn qamtamasyz etýge baǵyttalǵan basym memlekettik tapsyrmalardy oryndaý úshin jarǵylyq kapıtalǵa memleket qatysatyn zańdy tulǵalarǵa respýblıkalyq jáne jergilikti bıýdjetterden berilgen tapsyrystardy bildiredi.
Memlekettik tapsyrys berýshi jáne memlekettik kelisimshartty oryndaıtyn merdiger bıýdjet qarajatyn maqsatty jáne tıimdi paıdalaný úshin jeke jaýapkershilikte bolady.
Buǵan deıin Qyrǵyzstan qurylys salasynan tender júıesin alyp tastaýdy kózdep otyrǵanyn habarlaǵan edik.