Qyrǵyzstanda Eýro-5 standartyna saı otyn óndirý josparlanyp jatyr
ASTANA. KAZINFORM — Qyrǵyzstanda «Djýnda» munaı óńdeý zaýytyn jańǵyrtýdyń kelesi kezeńi bastaldy. Bul týraly Kazinform agenttiginiń Bishkektegi menshikti tilshisi habarlaıdy.
Qyrǵyz Respýblıkasynyń ulttyq ınvestıtsııalar agenttigi Qytaıdyń «Ortalyq Azııa energetıkalyq kompanııasymen» qosymsha kelisimge qol qoıdy.
Atalǵan qujat Qara-Balta qalasyndaǵy «Djýnda» munaı óńdeý zaýytyn jan-jaqty damytýdyń jańa kezeńin bastaýǵa negiz bolady. Jańǵyrtý nátıjesinde zaýytta Eýro-5 standartyna saı otyn óndirý kózdelip otyr.
Óndiristik qurylymdy jandandyrý munaı ónimderiniń kólemin arttyryp, sapasyn jaqsartýǵa múmkindik beredi. Bul bastama otandyq munaı óńdeý salasynyń áleýetin kúsheıtip, óndiristik kooperatsııany keńeıtýge jáne osy salamen baılanysty sektordyń damýyna septigin tıgizedi. Budan bólek, jańa jumys oryndary ashylyp, ekonomıkalyq belsendilikti arttyrýǵa qosymsha jaǵdaı jasalady.
Buǵan deıin Qyrǵyzstanda janar-jaǵarmaı baǵasyn turaqtandyrý úshin memleket shamamen 1 mlrd som kóleminde sýbsıdııa bólgeni habarlanǵan bolatyn.
Al mamyr aıynyń sońynda Qyrǵyzstan Úkimeti janar-jaǵarmaı ımporttaýshylarǵa ýaqytsha sýbsıdııa berý jáne ishki naryqtaǵy otyn baǵasyn memlekettik retteý tetigin engizgen edi.
Aqzat Jıenalına
