Qyrǵyzstanda Eýrazııa ulttyq ýnıversıtetiniń fılıaly ashyldy
ASTANA. KAZINFORM — Bishkek qalasyndaǵy Osh memlekettik ýnıversıtetiniń bazasynda Eýrazııa ulttyq ýnıversıteti fılıalynyń saltanatty ashylý rásimi ótti, dep habarlaıdy Ǵylym jáne joǵary bilim mınıstrliginiń baspasóz qyzmeti.
Іs-shara Qazaqstan Respýblıkasynyń Prezıdenti Qasym-Jomart Toqaevtyń Qyrǵyz Respýblıkasyna resmı sapary aıasynda uıymdastyryldy.
Saltanatty sharaǵa Qazaqstan Respýblıkasynyń ǵylym jáne joǵary bilim mınıstri Saıasat Nurbek, Qyrǵyz Respýblıkasynyń ǵylym, joǵary bilim jáne ınnovatsııalar mınıstri Baktııar Orozov, Eýrazııa ulttyq ýnıversıtetiniń rektory Erlan Sydyqov, Osh memlekettik ýnıversıtetiniń rektory Qudaıberdi Qojobekov, sondaı-aq eki eldiń joǵary bilim berý júıesiniń ókilderi qatysty.
— Byltyr Qyrǵyzstan Prezıdentiniń Qazaqstanǵa sapary aıasynda eki eldiń jastaryn jaqyndastyra túsetin birqatar ýaǵdalastyqqa qol jetkizgen edik. Sonyń nátıjesinde Gýmılev atyndaǵy Eýrazııa ulttyq ýnıversıtetiniń Osh qalasyndaǵy fılıaly ashylýda. Budan bólek Qazaqstan Úkimeti qyrǵyz stýdentterine 50 grant bólip otyr. Kelesi jyldan bastap grant sanyn 60-qa deıin kóbeıtemiz dep sheshtik, — dep atap ótti Memleket basshysy saparynyń qorytyndysy boıynsha ótken baspasóz brıfınginde.
EUÝ-dyń Osh memlekettik ýnıversıtetindegi fılıaly ekologııa, aqparattyq-kommýnıkatsııalyq tehnologııalar jáne qyzmet kórsetý salasy boıynsha mamandardy daıyndaıtyn bolady. Sondaı-aq fılıal bazasynda eki eldiń stýdentteri orys tili men ádebıeti, aýdarma isi, shet tili, jýrnalıstıka, fızıka mamandyqtary boıynsha bilim alyp, oqýyn aıaqtaǵan soń eki ýnıversıtettiń qos dıplomyn alady.
— L. N. Gýmılev atyndaǵy Eýrazııa ulttyq ýnıversıtetiniń Qyrǵyz Respýblıkasyndaǵy fılıaly — eki eldiń bilim men ǵylym salasyndaǵy yntymaqtastyǵyn jańa sapaǵa kóteretin mańyzdy qadam. Osy alańda basym baǵyttar boıynsha kadr daıarlaý, birlesken zertteýler men qos dıplomdy baǵdarlamalardy keńeıtý arqyly óńirdiń adamı kapıtalyn nyǵaıtamyz, — dedi mınıstr Saıasat Nurbek.
Sonymen qatar EUÝ rektory Erlan Sydyqovtyń aıtýynsha, fılıaldyń júıeli jumysy óńirdiń adamı kapıtalyn nyǵaıtyp, bilim men ǵylym sınergııasy arqyly Ortalyq Azııanyń ornyqty damýyna berik zııatkerlik irgetas qalaıdy.
Aıta keteıik, L. N. Gýmılev atyndaǵy Eýrazııa ulttyq ýnıversıteti akademııalyq utqyrlyq jáne qos dıplomdyq bilim berý baǵdarlamalary boıynsha Qyrǵyz Respýblıkasynyń 16 ýnıversıtetimen yntymaqtasady.
Osydan buryn Memleket basshysy Kemel Toqaev atyndaǵy № 33 mektep-gımnazııaǵa barǵanyn jazǵanbyz.