Qyrǵyzstanda et klasterin damytý boıynsha pılottyq joba iske qosylady
ASTANA. KAZINFORM — Qyrǵyzstanda azyq-túlik baǵasyn turaqtandyrý jáne et óndirisin arttyrý maqsatynda et klasterin damytýǵa arnalǵan pılottyq joba bastalady, dep habarlaıdy Kabar.
Bul týraly Qyrǵyzstan Mınıstrler kabıneti tóraǵasynyń orynbasary – sý resýrstary, aýyl sharýashylyǵy jáne qaıta óńdeý ónerkásibi mınıstri Erlıst Akýnbekov málimdedi.
Joba aıasynda Shý oblysy men Bishkek qalasynda iri qara maldy óndiristik negizde bordaqylaýǵa baǵyttalǵan et klasteri qurylady.
2026 jyly osy klasterge qatysýshylarǵa jeńildetilgen nesıe berý arqyly memlekettik qoldaý kórsetiledi.
Jobaǵa qatysatyn Shý oblysy men Bishkek qalasyndaǵy iri qara maldy bordaqylaýmen aınalysatyn fermerler men agrokásipkerlerge tómen paıyzben jeńildetilgen nesıeler beriledi. Qarjylandyrý «Aıyl Bank» jáne «Eldık Bank» memlekettik bankteri arqyly júzege asyrylady.
Sonymen qatar elde azyq-túlik baǵasynyń ósýin tejeý, halyqtyń áleýmettik osal toptaryn qoljetimdi ónimdermen qamtamasyz etý jáne ishki naryqtaǵy turaqtylyqty saqtaý maqsatynda demalys kúnderi azyq-túlik jármeńkeleri uıymdastyrylyp keledi.
Budan buryn Qyrǵyzstan 2030 jylǵa deıin balabaqshamen qamtýdy 80%-ǵa jetkizýdi kózdeıtinin jazǵan bolatynbyz.
