Qyrǵyzstanda et baǵasyna memlekettik retteý engizildi
BІShKEK. KAZINFORM – Qyrǵyz elinde et baǵasynyń ósýine jol bermeý maqsatynda baǵany memlekettik retteýdi engizý týraly sheshim qabyldandy, dep habarlaıdy Kazinform tilshisi.
Qyrǵyz Respýblıkasynyń Sý resýrstary, aýyl sharýashylyǵy jáne qaıta óńdeý ónerkásibi mınıstrliginiń málimetinshe, memlekettik retteýdiń maqsaty – et baǵasynyń ósýine jol bermeý, maldyń shekaradan ótýin baqylaý jáne onyń eksportyna sandyq shekteýler engizý.
Ekonomıka jáne saýda mınıstrligine qarasty Monopolııaǵa qarsy retteý qyzmetine respýblıka boıynsha et baǵasyn únemi qadaǵalap, saraptap otyrý tapsyryldy. Aýyl sharýashylyǵy mınıstrligine qarasty Veterınarııa, mal sharýashylyǵy, jaıylymdyq jáne jemshópti damytý qyzmetine mal tasymaldaýmen aınalysatyn jeke kásipkerlerge veterınarııalyq-sanıtarııalyq baqylaýdy kúsheıtý, sondaı-aq Shekara qyzmetimen birlesip, kontrabandaǵa qarsy is-qımyl boıynsha naqty sharalar qabyldaý júkteldi.
Buǵan deıin habarlaǵanymyzdaı, Qyrǵyzstan halyqaralyq ınternet-trafıkke monopolııa engizdi.