Qyrǵyzstanda elektr energııasynyń tarıfi kóterildi

ASTANA. KAZINFORM — Qyrǵyzstanda 2024 jyldyń 1 mamyrynan bastap elektr qýatynyń tarıfi 11 tıynǵa ósti.

Qyrǵyzstan energetıka mınıstri Taalaıbek Ibraev áleýmettik jelidegi paraqshasynda elektr energııasy tarıfindegi sońǵy ózgeristerge qatysty túsinik berdi.

Ol Qyrǵyzstanda 2021-2025 jyldarǵa arnalǵan orta merzimdi tarıftik saıasat strategııasyna sáıkes elektr energııasy tarıfin ınflıatsııa deńgeıine qaraı jyl saıyn ózgertý qarastyrylǵanyn atap ótti. Soǵan sáıkes 1 mamyrdan bastap ósim 10,8 paıyzdy nemese 11 tıyndy qurady.

- Jyl saıynǵy kóterý sharalary elektr energııasyn óndirýge jumsalatyn shyǵyndardy tutynýshylarǵa arnalǵan tarıftermen birtindep teńestirý qajettiliginen týyndady. 2023 jyly bir kVt/saǵ elektr energııasynyń quny 2,41 som boldy, al turmystyq tutynýshylar úshin tarıf 1 mamyrǵa deıin 1 som boldy. Ortasha alǵanda, 700 kVt/saǵ deıingi gradatsııany eskere otyryp qoıylǵan tapshylyq 1,34 myńdy quraıdy, - dep túsindirdi mınıstr.

Onyń aıtýynsha, tutynylatyn árbir kVt/saǵ elektr energııasy jyl saıyn qordalanǵan másele týǵyzady. Kúzde jáne qysta bolatyn aýyr júktemelerge jabdyqty daıyndaý shyǵyndarynyń bir bóligi bıýdjet esebinen jabylady.

- Osylaısha, memlekettiń jańa mektep, aýrýhana, jol jáne basqa da mańyzdy jobalar salýǵa qarajaty energetıkaǵa baǵyttalady, bul rette problemalar sheshilmegen kúıinde qalyp otyr. Energetıkalyq kompanııalar endi jańa elektr stansalaryn salýdy josparlamaıdy, tek uzaq ýaqyt qyzmet etken jabdyqty jóndeýmen aınalysady. Eger qazir tarıfterdiń birtindep ósýin bastamasaq jáne birneshe jyl ishinde elektr energııasynyń ózindik qunyna teńestirilmese, onda elektr júıesiniń negizgi jabdyǵynyń tolyq isten shyǵý qaýpi bar, - dep jazdy ol.

Qyrǵyzstannyń Energetıka mınıstriniń aıtýynsha, ekonomıkalyq damýdyń negizi bolýy kerek sala qoldaýdy qajet etedi. Tutyný jyl saıyn 9-10% - ǵa ósedi.