Qyrǵyzstanda elektr energııasyn únemdeý úshin memlekettik qyzmetkerlerden galstýk taǵý talaby alynady
BІShKEK. KAZINORM – Qyrǵyzstan Mınıstrler kabınetiniń tóraǵasy Adylbek Qasymalıev memlekettik qyzmetkerlerge arnalǵan jańa dress-kod engizý týraly jarlyqqa qol qoıdy, dep habarlaıdy Kazinform agenttiginiń Bishkektegi menshikti tilshisi.
Úkimet basshysynyń aıtýynsha, memlekettik organ qyzmetkerleri kostıýmder men galstýktardan bas tartyp, jeıde kııýi kerek. Bul sheshim memlekettik mekemelerde kondıtsıonerlerdi paıdalanýdy qysqartýǵa jáne energııany únemdeýge septigin tıgizedi.
— Ystyq kúnder bastalǵanda biz kostıým kıip jumys isteımiz jáne kondıtsıonerlerdi qosamyz. Eger tek jeıde kısek, kondıtsıoner qosýdyń qajeti joq. Biz elektr energııasyn únemdeýimiz kerek. Erteńnen bastap Mınıstrler kabınetiniń qaýlysy tolyq oryndalýy tıis, — dedi Adylbek Qasymalıev.
Premer-mınıstr Japonııanyń tabysty tájirıbesin mysalǵa keltirdi, onda uqsas sharalar elektr jelisine júktemeni azaıtý arqyly mıllıardtaǵan ıendi únemdeýge múmkindik berdi.
Eske sala ketsek, 2023 jylǵy 1 tamyzdan 2026 jylǵy 31 jeltoqsanǵa deıin Qyrǵyzstanda energetıka sektorynda tótenshe jaǵdaı rejımi engizildi.
2025 jyldyń qyrkúıeginde Qyrǵyzstan energetıka mınıstri Taalaıbek Ibraev aldaǵy qystyń asa kúrdeli bolatynyn eskertip, halyqty elektr energııasyn únemdeýge shaqyrdy.
2025 jylǵy qarashada Qyrǵyzstan prezıdenti Sadyr Japarov Energetıka mınıstrligine elektr energııasyna shekteýsiz tarıf qoldanýdy toqtatýdy tapsyrdy.
El mektepterinde energııany únemdeý sharalary engizildi.
Al Bishkekte meıramhanalar, barlar men klýbtar keshki saǵat 22:00–den keıin jabylady.
Qyrǵyzstanda elektr energııasy tapshylyǵyna ne sebep bolǵanyn myna materıaldan oqı alasyz.
